ម៉ានីល៖ ចំនួនអ្នកស្លាប់ដោយសារទឹកជំនន់ និងការបាក់ដីនាពេលថ្មីៗនេះ នៅទូទាំងប្រទេសហ្វីលីពីន បានកើនឡើងដល់ ៥១ នាក់ហើយ ខណៈដែលអាជ្ញាធរបាននិងកំពុងស្វែងរកនិងជួយសង្រ្គោះមនុស្សមួយចំនួនបន្ថែមទៀត។
យោងតាមទីភ្នាក់ងារគ្រោះមហន្តរាយជាតិបានឱ្យដឹងថា ចំនួនអ្នកស្លាប់អាចកើនឡើងបន្ថែមទៀត ខណៈដែលក្រុមអ្នកជួយសង្គ្រោះស្វែងរកមនុស្ស ១៩ នាក់នៅតែបាត់ខ្លួនជាងមួយសប្តាហ៍ បន្ទាប់ពីភ្លៀងធ្លាក់ខ្លាំងបានវាយប្រហារតំបន់កណ្តាល និងភាគខាងត្បូងកាលពីចុងសប្តាហ៍បុណ្យណូអែល។
មន្រ្តីហ្វីលីពីនបានអះអាងថាអាកាសធាតុអាក្រក់បានវាយប្រហារខណៈប្រទេសដែលមានប្រជាជនភាគច្រើនកាតូលិកចំនួន ១១០ លាននាក់បានរៀបចំសម្រាប់ថ្ងៃបុណ្យណូអែលដ៏របស់ខ្លួនកាលពីកន្លងទៅ។
មនុស្សជាង ២៧០.០០០ នាក់ត្រូវស្វែងរកទីជម្រកសង្គ្រោះបន្ទាន់ ខណៈដែលភ្លៀងធ្លាក់លិចភូមិជនបទ ធ្វើឱ្យផ្ទះជាង ៤.៥០០ ខ្នងរងការខូចខាត និងបំផ្លាញដំណាំជាង ៧.០០០ ហិកតា។ ជំនួសឱ្យការប្រារព្ធពិធីជាមួយមនុស្សជាទីស្រលាញ់ ប្រជាជនរាប់ពាន់គ្រួសារបានរកឃើញថាពួកគេកំពុងសម្អាតលំនៅដ្ឋាន និងហាងរបស់ពួកគេ បន្ទាប់ពីទឹកជំនន់បានស្រកចុះ។ អ្នកស្លាប់ភាគច្រើនគឺនៅក្នុងខេត្ត Misamis Occidental នៅលើកោះ Mindanao។
ប្រទេសហ្វីលីពីនជាប់ចំណាត់ថ្នាក់ក្នុងចំណោមប្រទេសដែលងាយរងគ្រោះបំផុតចំពោះផលប៉ះពាល់នៃការប្រែប្រួលអាកាសធាតុ ហើយអ្នកវិទ្យាសាស្ត្របានព្រមានថាព្យុះកំពុងមានកម្លាំងកាន់តែខ្លាំងនៅពេលដែលពិភពលោកកាន់តែក្តៅ៕
