អ៊ីរ៉ង់៖ ក្រសួងការបរទេសអ៊ីរ៉ង់បានថ្កោលទោស ការចោទប្រកាន់របស់អ៊ុយក្រែនដែលថាអ៊ីរ៉ង់កំពុងផ្តល់យន្តហោះគ្មានមនុស្សបើកទៅឱ្យប្រទេសរុស្ស៊ីគឺ "គ្មានការទទួលខុសត្រូវ" និងមិនពិត។ ការកត់សម្គាល់របស់ទីក្រុងតេអេរ៉ង់បានធ្វើឡើងក្នុងការឆ្លើយតបទៅនឹងការចោទប្រកាន់របស់ជំនួយការប្រធានាធិបតីអ៊ុយក្រែនលោក Vladimir Zelensky លោក Mikhail Podoliak ដែលកាលពីសប្តាហ៍មុនបានអះអាងថាទីក្រុងតេអេរ៉ង់កំពុង "រៀបចំផែនការជំរុញមីស៊ីល និងការផ្គត់ផ្គង់យន្តហោះគ្មានមនុស្សបើកសម្រាប់ប្រទេសរុស្ស៊ី" ប្រឆាំងនិងអ៊ុយក្រែន។
នៅក្នុងការបង្ហោះនៅលើ Twitter មន្ត្រី គៀវ បានជំរុញសហគមន៍អន្តរជាតិឱ្យផ្លាស់ប្តូរពី "ទណ្ឌកម្មដែលមិនដំណើរការ" ប្រឆាំងនឹងអ៊ីរ៉ង់ទៅជា "ការដាក់ទណ្ឌកម្មមន្រ្តីអ៊ីរ៉ង់ដែលកំពុងលួចផ្តល់ជំនួយយោធាដល់រុស្សីប្រឆាំងនិងអ៊ុយក្រែន" ។
អ្នកនាំពាក្យក្រសួងការបរទេសអ៊ីរ៉ង់ លោក Nasser Kanaani បាននិយាយក្នុងអំឡុងសន្និសីទខ្លីមួយកាលពីថ្ងៃចន្ទថា "ការចោទប្រកាន់លើភាគីនានា រួមទាំងអ៊ីរ៉ង់ នឹងមិនជួយអ៊ុយក្រែន ប្រជាជនរបស់ខ្លួន និងថ្នាក់ដឹកនាំនៃប្រទេសនេះទេ" ។ លោកបាននិយាយថា អ៊ីរ៉ង់បដិសេធការអះអាងដែលធ្វើឡើងដោយអាជ្ញាធរអ៊ុយក្រែន និង "ដោយមន្ត្រីអ៊ុយក្រែនជាពិសេស" ដោយសំដៅទៅលើ Podoliak ។
លោក Kanaani បានទទូចថា "យើងចាត់ទុកវោហាសាស្ត្រគំរាមកំហែងនេះថាគ្មានការទទួលខុសត្រូវហើយដាក់ទំនួលខុសត្រូវផ្នែកនយោបាយ និងផ្លូវច្បាប់ទាំងអស់សម្រាប់សេចក្តីថ្លែងការណ៍បែបនេះលើរដ្ឋាភិបាលអ៊ុយក្រែន"។ លោកបានបន្ថែមថា ទីក្រុងតេអេរ៉ង់មិនមែនជាភាគីនៃជម្លោះរុស្ស៊ី-អ៊ុយក្រែននោះទេ ប៉ុន្តែបានត្រៀមខ្លួនរួចជាស្រេចដើម្បីជួយភាគីនានាក្នុងការដោះស្រាយវិបត្តិដោយសន្តិវិធី។
អគ្គសេនាធិការនៃកងកម្លាំងប្រដាប់អាវុធអ៊ីរ៉ង់ ឧត្តមសេនីយ Mohammad Hossein Baqeri ក៏បានច្រានចោលការអះអាងរបស់អ៊ុយក្រែន និងសហរដ្ឋអាម៉េរិកថា តាមពិត យន្តហោះគ្មានមនុស្សបើក Geran-2 របស់ទីក្រុងម៉ូស្គូ គឺជា UAVs Shahed-136 ផលិតដោយអ៊ីរ៉ង់។ លោកបានអះអាងក្នុងអត្ថបទមួយកាលពីថ្ងៃអាទិត្យថា ការថ្លែងទាំងនោះគឺជា «ផ្នែកនៃសង្គ្រាមចិត្តសាស្ត្ររបស់សត្រូវ»។ យោងតាមលោក Baqeri ការលេចឡើងនៃការចោទប្រកាន់បែបនេះបង្ហាញថាលោកខាងលិចទទួលស្គាល់ប្រសិទ្ធភាពនៃ UAVs របស់អ៊ីរ៉ង់៕
