
អារ៉ាប៊ី៖ ប្រធានាធិបតីចិនលោក ស៊ីជិនពីង កាលពីថ្ងៃព្រហស្បតិ៍បានជួបជាមួយស្តេចអារ៉ាប៊ី Salman bin Abdulaziz Al Saud នៃប្រទេសអារ៉ាប៊ីសាអូឌីតនៅវិមាន Al-Yamamah នៃទីក្រុង Riyadh ជំនួបនេះត្រូវបានអ្នកវិភាគមួយចំនួនយល់ឃើញចិនចាប់ផ្តើមពង្រីកឥទ្ធិពលរបស់ខ្លួនសារជាថ្មី ។
បើតាមលោលស៊ី លោកបានគូសបញ្ជាក់ថាលោករីករាយដែលបានទៅបំពេញទស្សនកិច្ចនៅអារ៉ាប៊ីសាអូឌីតម្តងទៀតបន្ទាប់ពីរយៈពេលប្រាំមួយឆ្នាំ ហើយនៅតែអាចរំលឹកឡើងវិញយ៉ាងរស់រវើកនូវដំណើរទស្សនកិច្ចចុងក្រោយរបស់គាត់ លោកស៊ីបានសម្តែងនូវសេចក្តីរីករាយដែលឃើញការឯកភាពដ៏សំខាន់ដែលប្រទេសទាំងពីបានឈានដល់ លើការអភិវឌ្ឍន៍ទំនាក់ទំនងចិន-និងអារ៉ាប៊ីសាអូឌីត។
សម្រាប់លោកស៊ី ប្រទេសចិនមើលឃើញថាអារ៉ាប៊ីសាអូឌីតជាកម្លាំងដ៏សំខាន់មួយនៅក្នុងពិភពពហុប៉ូល ហើយយកចិត្តទុកដាក់យ៉ាងខ្លាំងចំពោះការអភិវឌ្ឍន៍ភាពជាដៃគូយុទ្ធសាស្ត្រគ្រប់ជ្រុងជ្រោយជាមួយអារ៉ាប៊ីសាអូឌីត។ លោក ស៊ី បាននិយាយថា ប្រទេសចិនបានត្រៀមខ្លួនរួចជាស្រេចក្នុងការពង្រឹងទំនាក់ទំនងជាយុទ្ធសាស្ត្រ និងពង្រឹងកិច្ចសហប្រតិបត្តិការលើគ្រប់វិស័យជាមួយប្រទេសអារ៉ាប៊ីសាអូឌីត ដើម្បីផ្តល់ផលប្រយោជន៍អភិវឌ្ឍន៍នៃប្រទេសទាំងពីរ និងការពារសន្តិភាព និងស្ថិរភាពពិភពលោក។
ចំណែកស្តេច Salman បានស្វាគមន៍យ៉ាងកក់ក្តៅចំពោះវត្តមានលោក ស៊ី សម្រាប់ដំណើរទស្សនកិច្ចនៅអារ៉ាប៊ីសាអូឌីតម្តងទៀត ហើយទ្រង់មានបន្ទូលថា ដំណើរទស្សនកិច្ចដ៏ជោគជ័យរបស់លោក ស៊ី ទៅកាន់អារ៉ាប៊ីសាអូឌីតក្នុងឆ្នាំ ២០១៦ គឺពិតជាមិនអាចបំភ្លេចបាន។ ទ្រង់បន្ថែមថា ក្នុងរយៈពេលប៉ុន្មានឆ្នាំចុងក្រោយនេះ ប្រទេសចិន និងអារ៉ាប៊ីសាអូឌីតមានការរីកចម្រើនយ៉ាងល្អប្រសើរក្នុងការបង្កើតភាពស៊ីសង្វាក់គ្នារវាងយុទ្ធសាស្ត្រ និងការធ្វើកិច្ចសហប្រតិបត្តិការទ្វេភាគីលើវិស័យផ្សេងៗ។ ស្តេច Salman សង្គត់ធ្ងន់ថា ភាគីទាំងពីរបានឈានដល់ការយោគយល់គ្នាសំខាន់ៗលើបញ្ហាជាច្រើន ហើយអ្វីដែលជាផលប្រយោជន៍របស់ចិន គឺជាផលប្រយោជន៍របស់អារ៉ាប៊ីសាអូឌីតផងដែរ។
ស្តេច Salman បានកត់សម្គាល់ថា ទ្រង់វាយតម្លៃខ្ពស់ចំពោះទំនាក់ទំនងជាមួយប្រទេសចិន ហើយត្រៀមខ្លួនជាស្រេចដើម្បីធ្វើការជាមួយលោក Xi ដើម្បីជំរុញភាពជាដៃគូយុទ្ធសាស្ត្រដ៏ទូលំទូលាយរបស់អារ៉ាប៊ីសាអូឌីតជាមួយប្រទេសចិន និងផ្តល់អត្ថប្រយោជន៍កាន់តែច្រើនដល់ប្រជាជនទាំងពីរក្នុងការចែករំលែកទំនាក់ទំនងមិត្តភាព។ នេះក៏អំណោយផលដល់សន្តិភាព ស្ថិរភាព និងភាពស្ងប់ស្ងាត់ក្នុងតំបន់ និងពិភពលោក។ ប្រមុខរដ្ឋទាំងពីរបានចុះហត្ថលេខារួមគ្នាដោយផ្ទាល់នូវកិច្ចព្រមព្រៀងភាពជាដៃគូយុទ្ធសាស្ត្រគ្រប់ជ្រុងជ្រោយរវាងសាធារណៈរដ្ឋប្រជាមានិតចិន និងព្រះរាជាណាចក្រអារ៉ាប៊ីសាអូឌីត ហើយបានយល់ព្រមប្តូរវេនធ្វើជាម្ចាស់ផ្ទះនៃកិច្ចប្រជុំពីរឆ្នាំរវាងប្រមុខរដ្ឋនៃប្រទេសទាំងពីរថែមទៀតផង៕