វៀតណាម៖ ប្រជាជនវៀតណាមសរុបចំនួន ១០០ គ្រួសារត្រូវបានជម្លៀសចេញ ខណៈដែលគ្រាប់បែកដែលផ្ទុកសារធាតុផ្ទុះ ៨០គីឡូក្រាមពីសង្គ្រាមវៀតណាមត្រូវបានបំផ្លាញនៅក្នុងខេត្ត Quang Tri ភាគកណ្តាលកាលពីចុងសប្តាហ៍មុន។ គ្រាប់បែកម៉ាក ៨២ (MK82) មានទម្ងន់ ២២៧ គីឡូក្រាម ត្រូវបានផលិតដោយសហរដ្ឋអាម៉េរិក ដើម្បីប្រើប្រាស់ក្នុងសង្គ្រាមវៀតណាម (១៩៥៥-១៩៧៥) ។
មន្រ្តីវៀតណាមបានឲ្យដឹងថាគ្រាប់បែកនេះត្រូវបានគេរកឃើញនៅក្រោមដីមួយម៉ែត្រនៅក្នុងតំបន់លំនៅដ្ឋាននៃឃុំ Tan Thanh ស្រុក Huong Hoa នៃខេត្ត Quang Tri ។ ការរកឃើញនេះត្រូវបានធ្វើឡើងនៅពេលដែលគ្រួសារមួយកំពុងរៀបចំដីសម្រាប់ធ្វើកសិកម្ម។
លោកវរសេនីយ៍ឯក Ho Viet Hung ប្រធានផ្នែកវិស្វករប្រយុទ្ធនៃបញ្ជាការ ដែលត្រួតពិនិត្យការបំផ្លាញគ្រាប់បែក បាននិយាយថា ការគំរាមកំហែងមានកម្រិតខ្ពស់ ដោយសារគ្រាប់បែកមានកាំផ្ទុះរហូតដល់ ១,៥០០ ម៉ែត្រ។ ការបំផ្ទុះគ្រាប់បែកដែលបានធ្វើឡើងកាលពីថ្ងៃសៅរ៍សប្តាហ៍មុនបានស្នើឲ្យពលរដ្ឋចំនួន ១០០ គ្រួសារត្រូវជម្លៀសចេញ។ នៅក្នុងដំណើរការដែលគ្រប់គ្រងពីចម្ងាយ វិស្វករប្រយុទ្ធបានបំបែកផ្នែកជាមួយនឹងឧបករណ៍បំផ្ទុះចេញពីផ្នែកដែលមានសារធាតុផ្ទុះ។ បន្ទាប់ពីត្រូវបានដកចេញពីគ្រាប់បែកនោះ ផ្នែកដែលមានឧបករណ៍បំផ្ទុះត្រូវបានបំផ្លាញចោលនៅនឹងកន្លែង ខណៈដែលផ្នែកដែលមានជាតិផ្ទុះត្រូវបានផ្លាស់ប្តូរទៅតំបន់ដែលផ្នែកវិស្វករប្រយុទ្ធជាធម្មតាបំផ្លាញគ្រាប់បែក និងគ្រឿងផ្ទុះ។ ក្នុងរយៈពេលពីរឆ្នាំចុងក្រោយនេះ កងពលបានបំផ្ទុះគ្រាប់បែកចំនួន ២០១ គ្រាប់ ដែលក្នុងនោះមាន ៤គ្រាប់ដែលត្រូវបានចាត់ថ្នាក់ថា "គ្រោះថ្នាក់បំផុត" ដែលត្រូវតែដោះស្រាយនៅកន្លែងកើតហេតុ។
គួរបញ្ជាក់ថាចាប់ពីឆ្នាំ ១៩៥៤ ដល់ឆ្នាំ ១៩៧២ ទន្លេ Ben Hai នៅ Quang Tri គឺជាខ្សែព្រំដែនបណ្តោះអាសន្នរវាងភាគខាងត្បូង និងខាងជើងនៃប្រទេសវៀតណាមក្នុងអំឡុងសង្គ្រាមវៀតណាម។ ជាលទ្ធផលតំបន់ Quang Tri បានទទួលរងការទម្លាក់គ្រាប់បែកច្រើនបំផុតពេញមួយសង្រ្គាម ដោយ ៨៣% នៃតំបន់របស់ខ្លួនត្រូវបានបំពុលដោយសំណល់ជាតិផ្ទុះ។ យុទ្ធភណ្ឌមិនទាន់ផ្ទុះប្រមាណ ៨០០,០០០ គ្រាប់ត្រូវបានដោះស្រាយនៅក្នុងតំបន់នេះ ដោយសារមានជំនួយពីអង្គការមិនមែនរដ្ឋាភិបាលមួយចំនួន៕
