ព្យុងយ៉ាង៖ ប្រទេសកូរ៉េខាងជើងបានបាញ់មីស៊ីលផ្លោងពីលើប្រទេសជប៉ុនជាលើកដំបូងក្នុងរយៈពេល ៥ ឆ្នាំនាអង្គារនេះ ដោយបានជំរុញឱ្យមានការព្រមានសម្រាប់អ្នកស្រុកក្នុងការការពារ និងការផ្អាកបណ្តោះអាសន្ននៃប្រតិបត្តិការរថភ្លើងនៅភាគខាងជើងប្រទេសជប៉ុន។
អគ្គសេនាធិការចម្រុះរបស់កូរ៉េខាងត្បូង (JCS) និងឆ្មាំឆ្នេរសមុទ្រជប៉ុនបានរាយការណ៍អំពីការសាកល្បងមីស៊ីលដែលត្រូវបានបាញ់ពីលើឆ្នេរសមុទ្រភាគខាងកើតរបស់ប្រទេសកូរ៉េខាងជើង។
រដ្ឋាភិបាលជប៉ុនបានព្រមានពលរដ្ឋឲ្យការពារខ្លួនខណៈដែលមីស៊ីលចទំនងជាបានហោះរំលងទឹកដីរបស់ខ្លួនមុននឹងធ្លាក់ចូលសមុទ្រប៉ាស៊ីហ្វិក។ រដ្ឋបានជប៉ុនអះអាងថា ខ្លួនមិនបានប្រើប្រាស់វិធានការការពារណាមួយដើម្បីកម្ទេចមីស៊ីលនោះទេ ដែលជាការហោះហើរលើកដំបូង ឬឆ្លងកាត់ប្រទេសជប៉ុនពីកូរ៉េខាងជើងចាប់តាំងពីឆ្នាំ ២០១៧ ។
អ្នកនាំពាក្យរដ្ឋាភិបាលកំពូលរបស់ជប៉ុន លោក Hirokazu បាននិយាយថា "សកម្មភាពជាបន្តបន្ទាប់របស់កូរ៉េខាងជើង រួមទាំងការបាញ់មីស៊ីលផ្លោងម្តងហើយម្តងទៀត គំរាមកំហែងដល់សន្តិភាព និងសន្តិសុខរបស់ប្រទេសជប៉ុន តំបន់ និងសហគមន៍អន្តរជាតិ និងបង្កបញ្ហាប្រឈមយ៉ាងធ្ងន់ធ្ងរដល់សហគមន៍អន្តរជាតិទាំងមូល រួមទាំងប្រទេសជប៉ុនផងដែរ" ។
នាយករដ្ឋមន្ត្រី Fumio Kishida បានហៅសកម្មភាពរបស់កូរ៉េខាងជើងថា "ព្រៃផ្សៃ" ហើយថា រដ្ឋាភិបាលនឹងបន្តប្រមូល និងវិភាគព័ត៌មាន។
ការបាញ់បង្ហោះចុងក្រោយនេះ គឺជាលើកទី៥ របស់ទីក្រុងព្យុងយ៉ាង ក្នុងរយៈពេល ១០ ថ្ងៃ ចំពេលមានការពង្រឹងសាច់ដុំយោធាដោយសហរដ្ឋអាម៉េរិក និងកូរ៉េខាងត្បូង ដែលបានធ្វើសមយុទ្ធប្រឆាំងនាវាមុជទឹកត្រីភាគីកាលពីសប្តាហ៍មុន ជាមួយកងកម្លាំងជើងទឹកជប៉ុន។
ប្រទេសកូរ៉េខាងត្បូង បានធ្វើការបង្ហាញអាវុធទំនើបៗរបស់ខ្លួនកាលពីថ្ងៃសៅរ៍ ដើម្បីប្រារព្ធទិវាកងកម្លាំងប្រដាប់អាវុធរបស់ខ្លួន រួមមាន គ្រាប់រ៉ុក្កែតជាច្រើនគ្រាប់ មីស៊ីលផ្លោង រថក្រោះប្រយុទ្ធសំខាន់ៗ យន្តហោះដ្រូន និងយន្តហោះចម្បាំង F-35 ។
ទូរទស្សន៍ជប៉ុន NHK បានរាយការណ៍ថា ការសាកល្បងនេះបានជំរុញឱ្យក្រុមហ៊ុន East Japan Railway Co ផ្អាកប្រតិបត្តិការរថភ្លើងរបស់ខ្លួននៅក្នុងតំបន់ភាគខាងជើងផងដែរ៕
