ភ្នំពេញ៖ ភាពយន្តចម្រៀង "ជីវិតក្មេងវត្ត" គឺជាស្នាដៃនិពន្ធរបស់ សម្តេច ហ៊ុន សែន នាយករដ្ឋមន្រ្តីនៃកម្ពុជា។“ជីវិតក្មេងវត្ត” ជាភាពយន្តចម្រៀងដែលពោរពេញទៅដោយការតស៊ូ ព្យាយាមអំណត់អត់ធន និងការខិតខំប្រឹងប្រែងពុះពារគ្រប់ឧបសគ្គ ដើម្បីក្រេបយកចំណេះវិជ្ជារបស់សម្តេច កាលពីវ័យកុមារភាព។
ភាពយន្តចម្រៀង "ជីវិតក្មេងវត្ត" ត្រូវបានបើកសម្ពោធទស្សនាជាផ្លូវការនៅថ្ងៃទី២៨កញ្ញានេះ។ ភាពយន្តចម្រៀងផលិតដោយសមាគមសិល្បករខ្មែរ និងដឹកនាំសម្តែងដោយ លោក ហ្វៃ សំអាង។ ក្នុងនោះក៏មានការចូលរួមសម្តែងពីសិល្បៈករ សិល្បៈការិនី ទាំងក្មេងចាស់ ដែលសុទ្ធសឹងជាអ្នកមានជំនាញក្នុងការសម្តែងផងដែរ។
សូមជម្រាបថា កម្មវិធីបើកសម្ពោធជាផ្លូវការនូវភាពយន្តចម្រៀង ក្រោមអធិបតីភាពរបស់ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ចាប់ពីម៉ោង ១០:០០ នាទីតទៅ នៅអគារ ក្រសួងរៀបចំដែនដីនគរូបនីយកម្មនិងសំណង់ ដែលផ្សាយផ្ទាល់តាមរយៈទូរទស្សន៍ជាតិកម្ពុជា, បាយ័ន, ហង្សមាស, PNN, អប្សរា, ប៉ុស្តិ៍លេខ៥, អាស៊ីអាគ្នេយ៍, CTN, ប៉ុស្តិ៍ លេខ ៩, ប៉ុស្តិ៍លេខ ៣, Town, Fresh News និង Page Samdech Techo Hun Sen, Cambodian Prime Minister។
