សៀមរាប៖ តំណាងគណបក្សសម្ព័ន្ធដើម្បីប្រជាធិបតេយ្យ(LDP) លោក នី ចាន់ពិនិត្យ បានដាក់ពាក្យស្នើសុំទៅអាជ្ញាធរខេត្តសៀមរាប ឲ្យជួយអន្តរាគមន៍ និងចាត់វិធានការចំពោះពលរដ្ឋដែលមកស្នាក់នៅក្នុងចំការរបស់លោកទាំង២ ក្នុងភូមិថ្មជល់ ឃុំត្បែង ស្រុកបន្ទាយស្រី ដោយពុំព្រមចាកចេញទៅវិញ។
យោងតាមលិខិតដែលបានធ្វើឡើងនៅថ្ងៃទី ៦ ខែកញ្ញា ឆ្នាំ២០២២ ដែលផ្តិតមេដៃដោយលោក នី ចាន់ពិនិត្យ បានអះអាងថា គណបក្សសម្ព័ន្ធដើម្បីប្រជាធិបតេយ្យ(LDP) បានចុះកិច្ចសន្យាជាមួយរដ្ឋបាលខេត្តសៀមរាបឱ្យប្រជាពលរដ្ឋជាអ្នកគាំទ្របក្សស្នាក់នៅក្នុងចម្ការបញ្ចាប់ការជួបជុំគ្នាត្រឹមថ្ងៃទី ៥ កញ្ញា ឆ្នាំ២០២២។ប៉ុន្តែមកដល់ពេលនេះ មានអ្នកគាំទ្រមួយចំនួនមិនព្រមចាកចេញពីចម្ការនោះទេ។
ដូច្នេះលោក នី ចាន់ពិនិត្យ បានស្នើសុំទៅអាជ្ញាធរខេត្តសៀមរាបឲ្យជួយអន្តរាគមន៍ និងចាត់វិធានការចំពោះពលរដ្ឋដែលមកស្នាក់នៅក្នុងចំការរបស់លោកទាំង២ ក្នុងភូមិថ្មជល់ ឃុំត្បែង ស្រុកបន្ទាយស្រី ដោយពុំព្រមចាកចេញទៅវិញ។
គួរបញ្ជាក់ថា លោក ខឹម វាសនា ប្រមុខបក្សសម្ព័ន្ធដើម្បីប្រជាធិបតេយ្យ បានសរសេរ នៅលើហ្វេសប៊ុករបស់ខ្លួនថា តាមការធ្វើវិបស្សនា លោកអះអាងថា ភពផែនដីនឹងត្រូវជន់លិចនៅពេលខាងមុខ ហើយអំពាវនាវឲ្យអ្នកដែលគាំទ្រខ្លួនវិលមកជុំគ្នានៅលើដីចម្ការរបស់លោកនៅក្នុងខេត្តសៀមរាបទើបអាចរួចផុតពីគ្រោះមហន្តរាយ។ សំណេរលោក ខឹម វាសនា បានញ៉ាំងឲ្យពលរដ្ឋយ៉ាងហោចណាស់ ១ម៉ឺន៥ពាន់នាក់ បានវេចមុង ភួយ ទៅទីនោះ ខណៈដែលពលករខ្មែរនៅកូរ៉េជាង១ពាន់នាក់ ដែលជាអ្នកគាំទ្រ ក៏ប្រញាប់ប្រញាល់ត្រលប់មកកម្ពុជា ដោយបោះបង់ការងាររបស់ខ្លួន។
ក្រោយពីអាជ្ញាធរខេត្តសៀមរាប បានដាក់កំហិតឲ្យពលរដ្ឋទាំងនោះ ចាកចេញពលរដ្ឋមួយចំនួនបានចាប់ផ្តើមរៀបចំបង្វិចខោអាវរបស់ខ្លួនចាកចេញពីចម្ការ ពីកន្លែងប្រមូលផ្តុំរបស់លោក ខឹម វាសនា នៅជើងភ្នំគូលែន ខេត្តសៀមរាប ខណៈពលរដ្ឋមួយចំនួនទៀតកំពុងចរចាបន្ត៕
