អាម៉េរិកអនុម័តការលក់អាវុធចេញទៅឲ្យតៃវ៉ាន់

អាម៉េរិក៖ រដ្ឋបាល Biden បានផ្ញើការជូនដំណឹងជាផ្លូវការទៅកាន់សភាអាមេរិកកាលពីថ្ងៃសុក្រអំពីការលក់អាវុធ និងមីស៊ីលប្រឆាំងយន្តហោះទៅឱ្យតៃវ៉ាន់។ តម្លៃសរុបនៃកិច្ចសន្យាថែទាំបរិក្ខារ និងថែទាំបន្ថែមដល់ជាង ១,១ ពាន់លានដុល្លារ។

នេះជាកញ្ចប់សព្វាវុធទី ៥ និងធំបំផុតរហូតមកដល់ពេលនេះសម្រាប់តៃវ៉ាន់ ដែលបានអនុម័តដោយរដ្ឋាភិបាលអាមេរិកបច្ចុប្បន្ន។ សមាសធាតុដែលមានតម្លៃថ្លៃបំផុតរបស់វាគឺប្រព័ន្ធរ៉ាដាឃ្លាំមើល SRP ដែលមានតម្លៃ ៦៦៥.៤ លានដុល្លារ តាមពីក្រោយដោយមីស៊ីលប្រឆាំងនាវា Harpoon ចំនួន ៦០ គ្រាប់មានតម្លៃ ៣៥៥ លានដុល្លារ និងមីស៊ីលប្រឆាំងយន្តហោះ 100 Sidewinder មានតម្លៃ ៨៥.៦ លានដុល្លារ។ កិច្ចសន្យាក៏រួមបញ្ចូលផងដែរនូវឧបករណ៍ពាក់ព័ន្ធ គ្រឿងបន្លាស់ និងការថែទាំ។ កិច្ចសន្យាទាំងបីត្រូវបានបំភ្លឺដោយទីភ្នាក់ងារសហប្រតិបត្តិការសន្តិសុខការពារជាតិទៅកាន់សភាកាលពីថ្ងៃសុក្រ ដែលជាផ្នែកមួយនៃដំណើរការជូនដំណឹងជាផ្លូវការ។

បន្ថែមពីនេះកាលពីដើមសប្តាហ៍នេះ បន្ទាប់ពីសារព័ត៌មានមួយចំនួនរបស់សហរដ្ឋអាមេរិកបានចេញផ្សាយព័ត៌មានលម្អិតនៃការលក់អាវុធឲ្យទៅតៃវ៉ាន់ ប្រទេសចិនបានព្រមានសហរដ្ឋអាមេរិកប្រឆាំងនឹងទង្វើបែបនេះ។

អ្នកនាំពាក្យស្ថានទូតចិនប្រចាំទីក្រុងវ៉ាស៊ីនតោន លោក Liu Pengyu បាននិយាយថា ទីក្រុងប៉េកាំងនឹងឆ្លើយតបជាមួយនឹង “វិធានការដ៏ម៉ឺងម៉ាត់ និងច្បាស់លាស់មួយ” ប្រសិនបើសហរដ្ឋអាមេរិកបន្តលក់អាវុធឱ្យទីក្រុងតៃប៉ិ។

គួរបញ្ជាក់ថាតៃវ៉ាន់ត្រូវបានគ្រប់គ្រងដោយអ្នកជាតិនិយមចិនដែលបានចាកចេញពីដីគោកក្នុងឆ្នាំ ១៩៤៩បន្ទាប់ពីចាញ់សង្គ្រាមស៊ីវិលទៅកងកម្លាំងកុម្មុយនិស្ត។ ទីក្រុងប៉េកាំងចាត់ទុកតៃវ៉ាន់ជាផ្នែកមួយនៃប្រទេសចិន ហើយសហរដ្ឋអាមេរិកបានទទួលស្គាល់គោលនយោបាយ "ចិនតែមួយ" នេះនៅក្នុងសកម្មភាពផ្លូវការមួយចំនួនតែប៉ុណ្ណោះ៕