ភ្នំពេញ៖ ស្ថានទូតចិនប្រចាំនៅប្រទេសកម្ពុជា បានចេញសារជាសាធារណៈតាមបណ្តាលសង្គមផ្ញើជូនជនរួមជាតិតៃវ៉ាន់ទាំងអស់ដែលកំពុងស្ថិតនៅក្នុងប្រទេសកម្ពុជា ឱ្យទំនាក់ទំនងមកស្ថានទូត ដើម្បីជួយសង្គ្រោះក្នុងករណីត្រូវបានគេ«បង្ខំឱ្យធ្វើការល្បែងអនឡាញ»ខុសច្បាប់។
ការប្រកាសរបស់ស្ថានទូតយ៉ាងដូច្នេះ ធ្វើឡើងក្រោយពីស្ថានទូតទទួលបានព័ត៌មានជាច្រើនថា ជនជាតិចិនតៃវ៉ាន់មួយចំនួននៅប្រទេសកម្ពុជាត្រូវបានរឹតត្បិត ហើយត្រូវបានបង្ខំឱ្យធ្វើការល្បែងអនឡាញ បោកប្រាស់តាមបណ្ដាញទូរគមនាគមន៍ និង សកម្មភាពខុសច្បាប់ផ្សេងទៀត។
បើតាមស្ថានទូតចិនប្រចាំនៅកម្ពុជា ជនជាតិចិនតៃវ៉ាន់ គឺជាពលរដ្ឋចិន ហើយវាជាទំនួលខុសត្រូវរបស់ស្ថានទូត និង កុងស៊ុលចិននៅបរទេស ដើម្បីការពារសិទ្ធិ និង ផលប្រយោជន៍ស្របច្បាប់របស់ជនរួមជាតិតៃវ៉ាន់។សម្រាប់ស្ថានទូត មិនថាអ្នកជួបប្រទះនឹងទុក្ខលំបាកអ្វីមួយនៅក្នុងប្រទេសកម្ពុជា ជនជាតិចិនតៃវ៉ាន់ អានទាក់ទងស្ថានទូត ដើម្បីទទួលបានសេវាការពារ និង មានប្រសិទ្ធភាព ស្របតាមច្បាប់ និងបទប្បញ្ញត្តិ។
