ខេត្តចំនួន៨នៃកម្ពុជាអាចនឹងមាន«ជំនន់ទឹកភ្លៀង»

ភ្នំពេញ៖ចាប់ពីថ្ងៃទី១៤ -១៩ សីហា ភ្លៀងនឹងបន្តធ្លាក់ស្ទើរគ្រប់ទីកន្លែងជាបន្តបន្ទាប់ ក្នុងកម្រិតពីតិចទៅបង្គួរ និងច្រើនអន្លើ ខណៈខេត្តចំនួន៨នៃកម្ពុជាអាចនឹងមាន«ជំនន់ទឹកភ្លៀង»។នេះបើយោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម។

យោងតាមក្រសួងធនធានទឹក ខេត្តចំនួន៨ដែលទទួលរងកម្រិតទឹកភ្លៀងកម្រិតបង្គួរ និងច្រើនមានជាអាទិ៍៖ កំពង់ធំ ព្រះវិហារ រតនគិរី ស្ទឹងត្រែង ក្រចេះ ត្បូងឃ្មុំ កំពង់ចាម និងឧត្តរមានជ័យ នឹងអាចមានជំនន់ទឹកភ្លៀង។ស្ថានភាពខាងលើនេះ បណ្ដាលពី ជ្រលងសម្ពាធទាបឥណ្ឌា នឹងរំកិលធ្លាក់ចុះជាមួយនឹងប្រព័ន្ធសម្ពាធទាប ដែលអូសបន្លាយនៅភាគខាងជើងប្រទេស ថៃ ឡាវ និងវៀតណាម ដោយភ្ជាប់ជាមួយនឹងសម្ពាធទាប ក្នុងសមុទ្រចិនខាងត្បូង និង របបខ្យល់មូសុងនិរតីក្នុងកម្រិតពីមធ្យមទៅបង្គួរ៕