ថៃ៖ ប្រទេសថៃ និងចិនបានព្រមព្រៀងគ្នា ដើម្បីបន្តទំនាក់ទំនងមិត្តភាពជាប្រពៃណី ពង្រីកកិច្ចសហប្រតិបត្តិការទ្វេភាគី និងផែនការសម្រាប់ការអភិវឌ្ឍន៍ទំនាក់ទំនងនាពេលអនាគត។ ដោយការសម្រេចនេះធ្វើឡើងក្នុងជំនួបជាមួយទីប្រឹក្សារដ្ឋ និងជារដ្ឋមន្ត្រីការបរទេសចិន លោក វ៉ាង យី នាយករដ្ឋមន្ត្រីថៃ លោក ប្រាយុទ្ធ ចាន់អូចា កាលពីថ្ងៃទី៥ កក្កដា។
លោកប្រាយុទ្ធ បាននិយាយថា ប្រទេសរបស់លោកយកចិត្តទុកដាក់យ៉ាងខ្លាំងចំពោះគំនិតផ្តួចផ្តើមអភិវឌ្ឍន៍សកលលោកដែលស្នើឡើងដោយប្រទេសចិន និងគំនិតផ្តួចផ្តើមសន្តិសុខសកល ហើយកោតសរសើរសមិទ្ធិផលដ៏អស្ចារ្យរបស់ប្រទេសចិនក្នុងការលុបបំបាត់ភាពក្រីក្រខ្លាំង។
នាយករដ្ឋមន្ត្រីថៃរូបនេះ បានបន្តថា ប្រទេសថៃរំពឹងថានឹងរៀនពីបទពិសោធន៍អភិវឌ្ឍន៍របស់ប្រទេសចិន ចាប់យកនិន្នាការនៃសម័យកាល ចាប់យកឱកាសប្រវត្តិសាស្ត្រ និងជំរុញឱ្យមានកិច្ចសហប្រតិបត្តិការថៃ-ចិនលើគ្រប់វិស័យ។
ដោយកត់សម្គាល់ថាឆ្នាំនេះជាខួបលើកទី ១០ នៃការបង្កើតភាពជាដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ លោក វ៉ាង យី បាននិយាយថា ភាគីទាំងពីរបានយល់ព្រមកំណត់ការកសាងសហគមន៍ចិន-ថៃជាមួយនឹងអនាគតរួមគ្នាជាគោលដៅ និងចក្ខុវិស័យការងារ រួមគ្នាដើម្បីពង្រឹងអត្ថន័យនៃ «ចិននិងថៃគឺជិតស្និទ្ធដូចគ្រួសារមួយ» ហើយបន្តឆ្ពោះទៅមុខដើម្បីអនាគតកាន់តែមានស្ថិរភាព វិបុលភាព និងនិរន្តរភាពសម្រាប់ប្រទេសទាំងពីរ។
លោក វ៉ាង បានបញ្ជាក់ថា ប្រទេសចិន និងថៃអាចធ្វើការលើការសាងសង់ផ្លូវដែកចិន-ឡាវ-ថៃ ដើម្បីសម្រួលលំហូរទំនិញជាមួយនឹងបណ្តាញងាយស្រួល លើកកម្ពស់សេដ្ឋកិច្ច និងពាណិជ្ជកម្មជាមួយនឹងការដឹកជញ្ជូនកាន់តែប្រសើរឡើង និងជួយសម្រួលដល់កំណើនដ៏រឹងមាំនៃឧស្សាហកម្ម។
គួររំលឹកថា លោក វ៉ាង យី កំពុងធ្វើដំណើរទស្សនៈកិច្ចនៅអាស៊ីដូចជាប្រទេសថៃ ហ្វីលីពីន ឥណ្ឌូនេស៊ី និងម៉ាឡេស៊ី។ លោកក៏បានធ្វើជាសហប្រធាននៃកិច្ចប្រជុំរដ្ឋមន្ត្រីការបរទេសនៃកិច្ចសហប្រតិបត្តិការមេគង្គ-ឡានឆាង កាលពីថ្ងៃទី៤ នៅប្រទេសមីយ៉ាន់ម៉ាផងដែរ៕
