លោក ពូទីន នឹងចូលរួមកិច្ចប្រជុំកំពូល G20 នៅឥណ្ឌូនេស៊ី

រុស្ស៊ី៖ វិមានក្រឹមឡាំង បានប្រកាសកាលពីថ្ងៃទី ២៧ ថា ប្រធានាធិបតីរុស្ស៊ីលោក វ្ល៉ាឌីមៀ ពូទីន នឹងចូលរួមកិច្ចប្រជុំកំពូល G20 នៅប្រទេសឥណ្ឌូនេស៊ីក្នុងខែវិច្ឆិកានេះ។ ខណៈពេលដែលមេដឹកនាំលោកខាងលិចជាច្រើន បានទាមទារឱ្យមានការបណ្តេញរុស្ស៊ីចេញពីព្រឹត្តិការណ៍នេះ។

ប្រធានាធិបតីឥណ្ឌូនេស៊ីលោក ចូកូ វីដូដូ ដែលកំពុងធ្វើជាម្ចាស់ផ្ទះនៃកិច្ចប្រជុំនៅឆ្នាំនេះ បានអញ្ជើញលោកពូទីនឱ្យចូលរួមក្នុងកិច្ចប្រជុំនៅកោះបាលី។ ជំនួយការប្រធានាធិបតីរុស្សី Yuri Ushakov បានប្រកាសពីការចូលរួមរបស់លោកពូទីន ប៉ុន្តែបានប្រាប់អ្នកសារព័ត៌មានថា វានៅមិនទាន់ច្បាស់ថាតើមេដឹកនាំរុស្ស៊ី នឹងចូលរួមនៅក្នុងសមត្ថភាពអ្វីនោះទេ។

កិច្ចប្រជុំកំពូល G20 ប្រមូលផ្តុំមេដឹកនាំនៃប្រទេសដែលមានសេដ្ឋកិច្ចធំជាងគេទាំង ២០ របស់ពិភពលោក ដោយមានតំណាងសហភាពអឺរ៉ុបក៏ចូលរួមជាមួយប្រមុខរដ្ឋអឺរ៉ុប និងអង្គការអន្តរជាតិមួយចំនួន រួមទាំងអង្គការសហប្រជាជាតិ និងអង្គការសុខភាពពិភពលោក ដែលបានអញ្ជើញជាភ្ញៀវជារៀងរាល់ឆ្នាំ។

ប្រធានាធិបតីអាមេរិកលោក ចូ បៃដិន បានអំពាវនាវដល់លោក វីដូដូ កាលពីខែមីនា ដើម្បីដកលោក ពូទីន ចេញពីកិច្ចប្រជុំឆ្នាំនេះ។ ទោះជាយ៉ាងណាក៏ដោយ លោក វីដូដូ មិនបានចូលទៅក្នុងយុទ្ធនាការដាក់សម្ពាធលើរុស្ស៊ីនោះទេ ហើយបានអញ្ជើញលោក ពូទីន តាមការគ្រោងទុក។ មេដឹកនាំឥណ្ឌូនេស៊ីក៏បានអំពាវនាវឱ្យប្រធានាធិបតីអ៊ុយក្រែនលោក ហ្សេឡែនស្គី ធ្វើដំណើរទៅកាន់កោះបាលីក្នុងខែវិច្ឆិកាផងដែរ។

លោក វីដូដូ បានចូលរួមកិច្ចប្រជុំកំពូល G7 នៅប្រទេសអាឡឺម៉ង់ជាភ្ញៀវកិត្តិយសនៅចុងសប្តាហ៍នេះ ហើយបន្ទាប់ពីចាកចេញកាលពីថ្ងៃទី២៦ លោកនឹងធ្វើដំណើរក្នុងសប្តាហ៍នេះទៅកាន់ក្រុងគៀវ និង មូស្គូ ដើម្បីជួបជាមួយ ហ្សេឡែនស្គី និង លោក ពូទីន។

នៅក្នុងការបង្ហោះតាម Twitter លោក វីដូដូ បាននិយាយថា លោកមានបំណង «អញ្ជើញមេដឹកនាំទាំងពីរឱ្យបើកការសន្ទនា និងបញ្ឈប់សង្គ្រាម»៕