សៀមរាម៖ ស្ថានទូតឥណ្ឌាប្រចាំទីក្រុងភ្នំពេញនាថ្ងៃទី២១ ខែមិថុនា ឆ្នាំ២០២២នេះបានសហការជាមួយក្រសួងវប្បធម៌និងវិចិត្រសិល្បៈ ក្រសួងទេសចរណ៍ ក្រសួងអប់រំ យុវជន និងកីឡា ប្រារព្ធទិវាយោគៈអន្តរជាតិលើកទី៨ ក្រោមប្រធានបទ យោគៈសម្រាប់មនុស្សជាតិ នៅមុខព្រះលានជល់ដំរី ក្រុងអង្គរធំ។
ថ្លែងក្នុងទិវាយោគៈអន្តរជាតិលោកទី៨ ឯកឧត្តមបណ្ឌិត Rajkkunmar Ranjan Singh អនុរដ្ឋមន្ត្រីក្រសួងការបរទេសនៃសាធារណរដ្ឋឥណ្ឌា មានប្រសាសន៍លើកឡើងថា លោកពិតជាមានសេចក្តីសោមនស្សរីករាយនិងមានមោទកភាពជាខ្លាំងដែលបានចូលរួមការអបអរទិវាយោគៈអន្តរជាតិលើកទី៨នៅខេត្តសៀមរាប ប្រទេសកម្ពុជា នាឱកាសនេះ។
ឯកឧត្តមបន្តថាយោគៈ គឺជាការហ្វឹកហាត់ផ្នែកផ្លូវកាយ និងផ្លូវចិត្តតាមបែបបុរាណ វាមានដើមកំណើតនៅប្រទេសឥណ្ឌា។ ពាក្យថា យោគៈ នេះមកពីសំស្ក្រឹត និងមានន័យថាចូលរួមឬរួបរួម។ វាតំណាងឱ្យការសំយោគគ្នារវាងចិត្ត និងកាយ គំនិត និងសកម្មភាព ការអត់ធ្មត់ និងការពេញចិត្ត ភាពសុខដុមរមនារវាងមនុស្ស និងធម្មជាតិ និងវិធីសាស្ត្រដ៏បរិសុទ្ធចំពោះសុខភាព និងសុខុមាលភាព។
សូមជម្រាបថា ប្រតិភូអញ្ចើញចូលរួមជាអធិបតីក្នុងទិវាយោគៈអន្តរជាតិលោកទី៨ នាឱកាសនេះ មានឯកឧត្តមបណ្ឌិត Rajkkunmar Ranjan Singh អនុរដ្ឋមន្ត្រីក្រសួងការបរទេសនៃសាធារណរដ្ឋឥណ្ឌា លោកជំទាវ Devyani Khobragade ឯកអគ្គរដ្ឋទូតនៃសាធារណរដ្ឋឥណ្ឌាប្រចាំកម្ពុជា ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ ឯកឧត្តម ឡុង កុសល អគ្គនាយករងអាជ្ញាធរជាតិអប្សរា ឯកឧត្តម អ៊ឹង គឹមលាង អភិបាលរងនៃគណៈអភិបាលខេត្តសៀមរាប ឯកឧត្ដម ម៉ុល កាដូ អគ្គនាយករងនៃអគ្គនាយកដ្ឋានកីឡាក្រសួងអប់រំ យុវជននិងកីឡា រួមទាំងភ្ញៀវជាតិនិងអន្តរជាតិ សិក្សានុសិស្សប្រមាណ៦០០រយនាក់៕
