ភ្នំពេញ៖ តំបន់GMS សំដៅដល់បណ្តាប្រទេសដែលមានទន្លេមេគង្គហូរកាត់រួមមាន កម្ពុជា ចិន មីយ៉ាន់ម៉ា ឡាវ វៀតណាម និងថៃ ទទួលបានអត្រាវិនិយោគរហូតដល់៨៥% នៃក្របខ័ណ្ឌវិនិយោគក្នុងតំបន់GMS គិតត្រឹមឆ្នាំ២០២២ ដែលតួរលេខនេះស្មើនឹង៧៨គម្រោង ដែលមានទុនវិនិយោគ សរុប៦៥,៨ ពាន់លានដុល្លារ។ នេះបើតាមសេចក្តីប្រកាសរបស់ក្រសួងសាធារណការ និងដឹកជញ្ជូន។
រាជរដ្ឋាភិបាលកម្ពុជា បានធ្វើជាម្ចាស់ផ្ទះរៀបចំកិច្ចប្រជុំលើកទី២៥ នៃវេទិកាដឹកជញ្ជូនអនុតំបន់មេគង្គ (STF-25) នៅខេត្តសៀមរាប ហើយកិច្ចប្រជុំSTF-25នៅឆ្នាំ២០២២នេះ មានគោលបំណងដើម្បីរាយការណ៍ និងផ្លាស់ប្តូរគំនិតអំពីរបៀបដែលវេទិកាដឹកជញ្ជូនអនុតំបន់មេគង្គ(STF) អាចចូលរួមចំណែកក្នុងការអនុវត្តបញ្ហាអាទិភាព និងគំនិតផ្តួចផ្តើមក្រោមក្របខណ្ឌយុទ្ធសាស្រ្តកម្មវិធីកិច្ចសហប្រតិបត្តិការសេដ្ឋកិច្ច GMS ឆ្នាំ២០៣០ (GMS-2030) និងផែនការស្តារ និងឆ្លើយតបទៅនឹងជំងឺកូវីដ-១៩របស់GMS និងដើម្បីធ្វើបច្ចុប្បន្នភាព និង/ឬអនុម័តលើជំហានបន្ទាប់។
នៅក្របខណ្ឌGMS-២០៣០ វិស័យដឹកជញ្ជូននឹងបង្កើតជាយុទ្ធសាស្ត្រ ឬគំនិតថ្មីៗ ចំនួនប្រាំមួយ៦រួមមាន៖ (១)យុទ្ធសាស្ត្រ និងផែនការមេផ្លូវដែក នឹងត្រូវបានបង្កើតឡើងជាមួយនឹងភាពលេចធ្លោដែលផ្តល់ឱកាសដល់ការវិនិយោគរបស់ផ្នែកឯកជន និងការអភិវឌ្ឍដល់ដៃគូរអភិវឌ្ឍន៍ (២) ការសង្កត់ធ្ងន់លើការឆ្ពោះទៅរកការអភិវឌ្ឍ និងការពង្រីកសមត្ថភាពនៅក្នុងវិស័យដឹកជញ្ជូនតាមផ្លូវសមុទ្រ ទន្លេ និងកំពង់ផែ ឬផែស្ងួត (៣) លើកកំពស់ការដឹកជញ្ជូនតាមផ្លូវទឹក ផ្លូវសមុទ្រ និងសេវាដឹកអ្នកដំណើរ (៤) ជំរុញការអភិវឌ្ឍព្រលានយន្តហោះអន្តរជាតិ (៥) ជំរុញការធ្វើសមាហរណកម្មការដឹកជញ្ជូនតាម ទីក្រុងទៅក្នុងយុទ្ធសាស្ត្រ និងផែនការនគរូបនីយកម្ម និង (៦)ការពិចារណាលើផលប៉ះពាល់សង្គម បរិស្ថាន និងការតាំងទីលំនៅថ្មីនៃគម្រោងដឹកជញ្ជូន ក៏ដូចជាសុវត្ថិភាពផ្លូវថ្នល់ ដែលជាបញ្ហាអាទិភាព។
ការដឹកជញ្ជូននៅតែបន្តជាវិស័យដ៏ធំជាងគេ ក្នុងនោះមានអត្រាវិនិយោគរហូតដល់៨៥% នៃក្របខ័ណ្ឌវិនិយោគក្នុងតំបន់GMS គិតត្រឹមឆ្នាំ២០២២ ដែលតួរលេខនេះស្មើនឹង៧៨គម្រោង ដែលមានទុនវិនិយោគ សរុប៦៥,៨ ពាន់លានដុល្លារ។ ផលប័ត្រវិនិយោគផ្នែកដឹកជញ្ជូនបច្ចុប្បន្ននៅក្នុងកម្មវិធីGMS នៅតែបន្ត មានថាមពលជាមួយនឹងគម្រោងសំខាន់ៗជាច្រើនដែលកំពុងត្រូវបានអនុវត្តនាពេលបច្ចុប្បន្ន។
គួរបញ្ជាក់ថា GMS សំដៅដល់បណ្តាប្រទេសដែលមានទន្លេមេគង្គហូរកាត់រួមមាន៖ កម្ពុជា ចិន មីយ៉ាន់ម៉ា ឡាវ វៀតណាម និងថៃ។ GMS បង្កើតឡើងដើម្បីអភិវឌ្ឍលើវិស័យអាទិភាពមួយចំនួនដូចជា កសិកម្ម ថាមពល បរិស្ថាន សុខភាព ការអភិវឌ្ឍធនធានមនុស្ស បច្ចេកវិទ្យាព័ត៌មាន និងទូរគមនាគមន៍ ទេសចរណ៍ ការដឹកជញ្ជូន ការធ្វើពាណិជ្ជកម្ម ការអភិវឌ្ឍទីក្រុង និងតំបន់សេដ្ឋកិច្ចពិសេសតាមព្រំដែន៕
