អ៊ីរ៉ាក់៖ ប្រទេសអ៊ីរ៉ាក់ បានទទួលរងនូវការវាយប្រហារដោយព្យុះខ្សាច់ម្ដងទៀតនៅថ្ងៃទី ១៣ ហើយអាកាសយានដ្ឋានក្នុងរដ្ឋធានីបាកដាដ និងទីក្រុង Najaf ត្រូវបានបិទ។
យោងតាមទីភ្នាក់ងារសារព័ត៌មានបារាំង AFP នៅព្រឹកថ្ងៃទី១៣ ព្យុះខ្សាច់បានបោកបក់មកលើទីក្រុងបាកដាដ និងតំបន់ជុំវិញ ដោយអាចមើលឃើញតែប៉ុន្មានរយម៉ែត្រប៉ុណ្ណោះ ហើយស្រទាប់ខ្សាច់ និងធូលីដ៏ក្រាស់បានធ្លាក់នៅខាងក្រៅ។
អាកាសយានដ្ឋានបាកដាដត្រូវបានបិទជាបណ្ដោះអាសន្ននៅមុនថ្ងៃ ហើយមិនបានដំណើរការឡើងវិញទេរហូតដល់ម៉ោងប្រហែល ១០៖៣០ ។ យោងតាមសារព័ត៌មាន Associated Press បានឱ្យដឹងថា ព្យុះខ្សាច់ បានធ្វើឱ្យអ្នកស្រុកនៅក្រុងបាកដាដមួយចំនួនត្រូវទៅមន្ទីរពេទ្យដោយសារមានបញ្ហាផ្លូវដង្ហើម។
អាកាសយានដ្ឋាននៅក្នុងទីក្រុង Najaf ក៏ត្រូវបានបិទអស់រយៈពេលជាច្រើនម៉ោង បន្ទាប់ពីព្យុះខ្សាច់បានឆ្លងកាត់។ យោងតាមទីភ្នាក់ងារសារព័ត៌មានបារាំង AFP បានឱ្យដឹងថា នេះជាព្យុះខ្សាច់ទីដប់ហើយ ដែលអ៊ីរ៉ាក់បានជួបប្រទះចាប់តាំងពីពាក់កណ្តាលខែមេសា។
ព្យុះខ្សាច់ និងធូលីពីមុនក៏បានបណ្តាលឲ្យមានការបិទអាកាសយានដ្ឋានជាច្រើនក្នុងប្រទេសអ៊ីរ៉ាក់ជាបណ្ដោះអាសន្ន។ ព្យុះខ្សាច់ក្នុងខែឧសភា ក៏បានសម្លាប់មនុស្សម្នាក់ដែរ។
អ៊ីរ៉ាក់ គឺជាប្រទេសមួយក្នុងចំណោមប្រទេសដែលរងផលប៉ះពាល់ខ្លាំងបំផុត ដោយការប្រែប្រួលអាកាសធាតុ និងវាលខ្សាច់ ដូចដែលបានវាយតម្លៃដោយអង្គការសហប្រជាជាតិ។
មន្ត្រីក្រសួងបរិស្ថានអ៊ីរ៉ាក់ Issa Fayyad បានព្រមានកាលពីខែមេសាថា ក្នុងរយៈពេល ២០ ឆ្នាំខាងមុខ អ៊ីរ៉ាក់អាចប្រឈមមុខនឹងអាកាសធាតុខ្សាច់ និងធូលីជាមធ្យម ២៧២ ថ្ងៃក្នុងមួយឆ្នាំ ហើយនៅឆ្នាំ ២០៥០ អាចមានព្យុះខ្សាច់ និងធូលី ៣០០ ថ្ងៃក្នុងមួយឆ្នាំ។
អ្នកជំនាញខ្លះនិយាយថា ការប្រែប្រួលអាកាសធាតុអាចមានផលប៉ះពាល់ដល់សង្គម និងសេដ្ឋកិច្ច។ ធនាគារពិភពលោកបានព្រមានកាលពីខែវិច្ឆិកាថា ធនធានទឹករបស់ប្រទេសអ៊ីរ៉ាក់អាចធ្លាក់ចុះ ២០ ភាគរយនៅឆ្នាំ ២០៥០ ដោយសារតែការប្រែប្រួលអាកាសធាតុ៕
