កម្ពុជាធ្លាក់ចុះភ្ញៀវទេសចរ១៧ភាគរយសម្រាប់ចុងសប្ដាហ៍ទី៤នៃខែកុម្ភៈ

ភ្នំពេញ៖ ការបន្តរកឃើញអ្នកឆ្លងជំងឺកូវីដ-១៩ ប្រភេទអូមីក្រុង នៅតាមបណ្តារាជធានី-ខេត្តនានាបានជះឥទ្ធិពលដល់ការសម្រចចិត្តធ្វើដំណើររបស់ភ្ញៀវទេសចរ។ ជាក់ស្តែង សម្រាប់ចុងសប្តាហ៍ថ្ងៃទី២៦-២៧ ខែកុម្ភៈ ឆ្នាំ២០២២ នៅទូទាំងប្រទេសកម្ពុជាទទួលបានភ្ញៀវសរុប ១៦៥,០៤៦នាក់ ហើយតួលេខនេះមានការធ្លាក់ចុះប្រមាណ១៧.០៩% បើធៀបនឹងចុងសប្តាហ៍កន្លងមក។ នេះបើាតមរបាយការណ៍របស់ក្រសួងទេសចរណ៍នៅថ្ងៃទី២៨ ខែកុម្ភៈ ឆ្នាំ២០២២។

បើតាមក្រសួងទេសចរណ៍ ខណៈដែលចរន្តភ្ញៀវទេសចរពីរាជធានីភ្នំពេញទៅកាន់គោលដៅទេសចរណ៍តាមខេត្តបន្តថមថយខ្លះទៀត ការដើរកម្សាន្តក្នុងខេត្តរបស់ប្រជាពលរដ្ឋក្នុងខេត្តផ្ទាល់ ក៏មានថមថយខ្លះដែរ ពិសេសគោលដៅទេសចរណ៍សំខាន់ៗ ដូចជាខេត្តសៀមរាប ព្រះសីហនុ និងកំពតជាដើម។

ទន្ទឹមនឹងនេះ ការគិតគូរអំពីការសន្សំប្រាក់ចំណូលមួយចំនួន ព្រមជាមួយការទុកពេលវេលាដើម្បីដើរកម្សាន្តពេលដែលជំងឺកូវីដ-១៩ ប្រភេទអូមីក្រុង មានការស្រាកស្រាន្ត ពិសេសនាឱកាសបុណ្យចូលឆ្នាំប្រពៃណីខ្មែរខាងមុខ ក៏ជាកត្តាមួយពន្យល់អំពីការថមថយចរន្តភ្ញៀវទេសចរនារយៈពេល២សប្តាហ៍ចុងក្រោយនេះផងដែរ។ នេះបើតាមក្រសួងទេសចរណ៍។

ដោយឡែក ទោះបីចរន្តភ្ញៀវទេសចរមានការថមថយខ្លះ ប៉ុន្តែក្រសួងទេសចរណ៍រដ្ឋបាលរាជធានី-ខេត្ត និងមន្ទីរទេសចរណ៍បានបន្តខិតខំណែនាំអប់រំ និងជំរុញការអនុវត្តវិធានការបង្កាជំងឺកូវីដ-១៩ វិធានការណ៍៣កុំ និង៣ការពារ និង SOP ឲ្យបានគ្រប់មូលដ្ឋានអាជីវកម្មទេសចរណ៍។

គួរបញ្ជាក់ថា បើតាមរបាយការណ៍ ក្នុងចំណោមភ្ញៀវទេសចរសរុប ក្នុងនោះភ្ញៀវជាតិមានចំនួន១៥៧,៤៤៣នាក់ និងភ្ញៀវបរទេសផ្ទៃក្នុង៧,៦០៣នាក់។ រីឯគោលដៅទេសចរណ៍សំខាន់ៗ រួមមាន៖ ខេត្តព្រះសីហនុ ៣៤,៥២២នាក់, ខេត្តពោធិ៍សាត់ ២៤,៥០២នាក់, ខេត្តបាត់ដំបង ២៣,៥១០នាក់, រាជធានីភ្នំពេញ ១៨,៧៣០នាក់, ខេត្តកំពត ៨,២៥៤នាក់, ខេត្តមណ្ឌលគិរី ៦,២៩៥នាក់, ខេត្តកែប ៥,៤៩៥នាក់ និងខេត្តសៀមរាប ៤,៩៦៤នាក់៕