ភ្នំពេញ៖ គិតចាប់ពីពេលចាប់ផ្តើមបើកឱ្យដំណើរការរោងចក្រចម្រាញ់រ៉ែមាសរបស់ក្រុមហ៊ុន Renaissance Minerals នៅថ្ងៃទី២១ ខែមិថុនា ឆ្នាំ២០២១ រហូតដល់ចុងឆ្នាំ២០២១នេះ គម្រោងអាជីវកម្មរ៉ែមាស ខ្នាតអន្តរជាតិ នៅ តំបន់ អូរខ្វាវ ស្រុកកែវសីមា ខេត្តមណ្ឌលគីរី បានផ្តល់ចំណូលមិនមែនសារពើពន្ធ តាមរយៈការបង់សួយសាររបស់ក្រុមហ៊ុន ចូលក្នុងថវិកាជាតិចំនួន សរុបចំនួន ១ ៦៧៧ ០៦៣,៣៨ ដុល្លារ។ នេះបើតាមលោក អ៊ឹង ឌីប៊ូឡា អគ្គនាយកនៃអគ្គនាយកដ្ឋានធនធានរ៉ែ។
លោក អ៊ឹង ឌីប៊ូឡា បានថ្លែងប្រាប់ស៊ីស៊ីថាមស៍ថា គិតមកដល់ពេលនេះ ដំណើរការចម្រាញ់រ៉ែមាសរបស់ក្រុមហ៊ុន Renaissance Mineral (Cambodia) Co.,Ltd. វិវឌ្ឍទៅមុខយ៉ាងរលូន តាមផែនការផលិតកម្មរបស់ក្រុមហ៊ុន ។ ផលិតផលដុំមាសដែលចម្រាញ់បាន ពីការដ្ឋានអាជីវកម្មរ៉ែមាសអូរខ្វាវ បានយកទៅបន្សុទ្ធបន្ថែមនៅរោងចក្របន្សុទ្ធមាសដែលមានទីតាំងនៅប្រទេសអូស្រ្តាលី ដើម្បីផលិតបានជាមាសទឹក៩៩%។
បើតាមលោក អ៊ឹង ឌីប៊ូឡា បានបញ្ជាក់ថា ហាងឆេងមាសនៅទីផ្សារអន្តរជាតិ ប្រែប្រួលជាប្រចាំថ្ងៃ ដូចនេះការកំណត់សួយសារ លើតម្លៃលក់ ផលិតផលមាស ត្រូវអនុវត្តតាមអាត្រា៣%នៃតម្លៃលក់ និងគិតតាមអាត្រាហាងមាសនៅថ្ងៃ ដែលផលិតផលមាស ត្រូវបានលក់។ ជាក់ស្តែង យោងតាមគេហទំព័រ Goldprice នៅថ្ងៃទី១៣ ខែមករា ឆ្នាំ២០២២នេះ ហាងឆេងមាស ៥៨ ៦៣៧ដុល្លារអាមេរិក/គីឡូក្រាមមាស។
ជាមួយគ្នានេះ លោក អ៊ឹង ឌីប៊ូឡា ក៏បានឲ្យដឹងដែរថា ក្រសួងរ៉ែ និងថាមពល បានផ្តល់អាជ្ញាបណ្ណស្វែងរុករករ៉ែ លោហៈចំនួន២៦អាជ្ញាបណ្ណ ដល់ក្រុមហ៊ុនចំនួន១៦មកពីប្រទេសចិន អូស្ត្រាលី កាណាដា និងកម្ពុជា បានចុះបញ្ជីពាណិជ្ជកម្ម នៅក្រសួងពាណិជ្ជកម្ម៕
