ក្រុមបាតុករប្រឆាំងការបិទខ្ទប់បានប៉ះទង្គិចជាមួយប៉ូលីសនៅទីក្រុងវីយែន

វីយែន៖ មនុស្ស ៧ នាក់ត្រូវបានឃុំខ្លួននៅក្នុងរដ្ឋធានីវីយែនរបស់ប្រទេសអូទ្រីស បន្ទាប់ពីក្រុមប្រឆាំងវិធានការណ៍ Covid-19 ដ៏តឹងរ៉ឹង ពួកគេបានព្យាយាមទម្លុះរបាំងរបស់ប៉ូលីស និងបានប៉ះទង្គិចជាមួយមន្រ្តីប៉ូលីស ខណៈប្រទេសនេះគ្រោងនឹងធ្វើការចាក់វ៉ាក់សាំងជាកំហិតនៅក្នុងខែកុម្ភៈ។

មនុស្សរហូតដល់ ២,០០០ នាក់បានប្រមូលផ្តុំគ្នា ដើម្បីធ្វើបាតុកម្មនៅទីក្រុងវីយែនកាលពីថ្ងៃសៅរ៍។ ពួកគេបានស្រែកថា "សេរីភាព" នៅពេលពួកគេដើរក្បួនប្រឆាំង ដោយមានសញ្ញាមួយចំនួនដែលនិយាយថា "មនុស្សកំពុងឃុំឃាំងមនុស្ស មិនមែនមេរោគទេ" ។

ក្រុមបាតុករជាច្រើននាក់បានឆ្លងកាត់របាំងការពាររបស់ប៉ូលីសដោយផ្លូវវាង ខណៈដែលក្រុមជាច្រើនទៀតបានទម្លុះរបាំងប៉ូលីស ដើម្បីរុញមនុស្សចេញពីផ្លូវ។ នៅចំណុចមួយ ប៉ូលីសបានបំបែកការប្រមូលផ្តុំអ្នកតវ៉ាពី ១៥០ ទៅ ២០០ នាក់ ដោយរឹបអូសទង់ជាតិ ស្គរ និងឧបករណ៍បំពងសំឡេង។

ប្រព័ន្ធផ្សព្វផ្សាយអូទ្រីសបានរាយការណ៍ដោយដកស្រង់សំដីប៉ូលីសថា មានការចោទប្រកាន់បន្ថែមជាង ១០០ ត្រូវធ្វើឡើងពីបទរំលោភច្បាប់ស្តីពីការជួបជុំជាសាធារណៈ និងធ្វើឲ្យមន្ត្រីម្នាក់បានរងរបួសស្រាល។

ការប្រមូលផ្តុំស្រដៀងគ្នានេះ ក៏ត្រូវបានធ្វើឡើងនៅទីក្រុង Klagenfurt, Innsbruck និង Leibnit។ ប្រទេស អូទ្រីសបានបន្ធូរបន្ថយការបិទខ្ទប់បំផុតរបស់ខ្លួនកាលពីសប្តាហ៍មុន ប៉ុន្តែសម្រាប់តែពលរដ្ឋដែលទទួលបានការចាក់វ៉ាក់សាំងប៉ុណ្ណោះ។ អាណត្តិវ៉ាក់សាំងទូទាំងប្រទេស នឹងចូលជាធរមានចាប់ពីថ្ងៃទី១ ខែកុម្ភៈ ឆ្នាំ ២០២២។

រដ្ឋាភិបាល បានបន្តការបិទខ្ទប់សម្រាប់អ្នកដែលមិនបានទទួលការចាក់វ៉ាក់សាំងរយៈពេល ១០ ថ្ងៃទៀត ប៉ុន្តែបានយល់ព្រមបន្ធូរបន្ថយការរឹតបន្តឹងមួយចំនួនលើការជួបជុំឯកជនក្នុងអំឡុងពេលបុណ្យណូអែល និងថ្ងៃចូលឆ្នាំសកល៕