![](https://cdn.cc-times.com/kh.cc-times.com/media/1741/large/1925055_626028424142297_2062997410_n.jpg?1588319642)
សៀមរាប៖ ប្រាក់ចំណូលបានពីការលក់សំបុត្រចូលទស្សនារមណីយដ្ឋានអង្គរ បានបន្តធ្លាក់ចុះ រវាងឆ្នាំ២០១៩ និងឆ្នាំ២០២០។ នេះបើយោងទៅតាម សេចក្ដីជូនដំណឹងរបស់គ្រឹះស្ថានអង្គរ ដែលស៊ីស៊ីថាមស៍ទទួលបាន នៅថ្ងៃទី០១ ខែឧសភា ឆ្នាំ២០២០។
បើតាមគ្រឹះស្ថានអង្គរបានគូសបញ្ជាក់ថា មានចំណូល ២៩,៣៦៨ដុល្លារក្នុងខែមេសា ដែលធៀបទៅនឹងឆ្នាំ២០១៩ ក្នុងខែមេសាដូចគ្នា មានចំណូលទៅដល់ ៨,១៨១,៧៩៥ដុល្លារ ធ្លាក់ចុះ ៩៩.៦៤ភាគរយ។
គ្រឹះស្ថានអង្គរ បានបញ្ជាក់ថា « អត្រាភ្ញៀវទេសចរ ដែលបានទិញបណ្ឌចូលទស្សនារមណីយដ្ឋានអង្គរ ក្នុងខែមេសា ឆ្នាំ២០២០នេះ មានចំនួន ៦៥៤នាក់ បើធៀបនឹងខែមេសា ឆ្នាំ២០១៩ ថយចុះ ៩៩.៦៤ភាគរយ រីឯចំណូលទទួលបានចំនួន ២៩,៣៦៨ដុល្លារ បើធៀបនឹងខែមេសា ឆ្នាំ២០១៩ ថយចុះ ៩៩.៦៤ភាគរយផងដែរ »។
![](https://cdn.cc-times.com/kh.cc-times.com/media/1743/large/1556763343849.jpg?1588320198)
![](https://cdn.cc-times.com/kh.cc-times.com/media/1745/large/fn-2020-05-01-11-29-39-0.jpg?1588320297)
ជាមួយគ្នានេះដែរ គ្រឹះស្ថានអង្គរ ក៏បានឲ្យដឹង ក្នុងរយៈពេល០៤ខែ ឆ្នាំ២០២០ ចាប់ពីខែមករា ដល់ខែមេសា ចំនួនភ្ញៀវទិញបណ្ឌចំនួន៣៨៤,៣១៧នាក់ ធៀបរយៈពេលដូចគ្នាឆ្នាំ២០១៩ ថយចុះ ៦០.៥១ភាគរយ រីឯចំណូលវិញ មាន ១៧,៩៤៩,២៩៩ដុល្លារ ធៀបរយៈពេលដូចគ្នាឆ្នាំ២០១៩ ថយចុះ៥៩.៣៣ភាគរយ។
គ្រឹះស្ថានអង្គរមិនបានបញ្ជាក់អំពីមូលហេតុ នៃការថយចុះភ្ញៀវទេសចរមករមណីយដ្ឋានអង្គរនោះទេ។ ប៉ុន្តែការថយចុះនេះស្របពេលការបិទច្រក ចេញចូលព្រំដែននៃប្រទេស ដើម្បីទប់ស្កាត់ និងការពារជំងឺឆ្លងកូវីដ១៩នេះ៕