ស្រុកមួយរបស់ចិនណែនាំពលរដ្ឋខ្លួនកុំទាន់ទៅកម្ពុជាព្រោះខ្លាចពួកគេចាញ់បោកក្រុមហ៊ុនល្បែងអនឡាញ

ចិន៖ ការិយាល័យសន្និសីទរួមស្រុកសៀនយ៉ូវ（Xian You）សម្រាប់ការបង្រ្កាបការឆបោកតាមអ៊ិនធឺណិតខុសច្បាប់ និងឧក្រិដ្ឋកម្មប្រភេទថ្មី របស់ប្រទេសចិន កាលពីថ្ងៃទី ២៧ ខែវិច្ឆិកា បានចេញសេចក្តីជូនដំណឹងជាបន្ទាន់មួយ ដោយបានក្រើនរំលឹកដល់សាធារណជនទូទៅក្នុងស្រុកកុំឱ្យធ្វើដំណើរទៅកាន់ប្រទេសចំនួន ៩ រួមមានកម្ពុជាផង លើកលែងតែចាំបាច់ ដើម្បីប្រឆាំងនឹងការឆបោកតាមអ៊ិនធឺណិត។

ក្នុងសេចក្តីជូនដំណឹង បានក្រើនរំលឹកដល់ប្រជាពលរដ្ឋកុំឱ្យធ្វើដំណើរទៅកាន់ប្រទេសចំនួន ៩ រួមមាន៖ កម្ពុជា អារ៉ាប់រួម ហ្វីលីពីន ថៃ មីយ៉ាន់ម៉ា ឡាវ ម៉ាឡេស៊ី ទួរគី និងឥណ្ឌូនេស៊ី ប្រសិនបើគ្មានការចាំបាច់។

ប្រសិនបើមានការងារបន្ទាន់ ពិតជាចាំបាច់ក្នុងការធ្វើដំណើរទៅកាន់ប្រទេសដែលបានរៀបរាប់ខាងលើ ដោយសារកាតព្វកិច្ចផ្លូវការ ការរៀនសូត្រ ឬការព្យាបាលវេជ្ជសាស្រ្ត។ អ្នកត្រូវតែរាយការណ៍ទៅភូមិ (សហគមន៍) និងប៉ុស្តិ៍ប៉ូលីសដែលការចុះឈ្មោះគ្រួសាររបស់អ្នកស្ថិតនៅ យ៉ាងហោចណាស់ ៣ ថ្ងៃជាមុន ហើយផ្តល់អាជ្ញាប័ណ្ណអាជីវកម្ម វិញ្ញាបនបត្រអចលនទ្រព្យ កិច្ចសន្យាទិញផ្ទះ កិច្ចសន្យាជួល កិច្ចសន្យាការងារត្រឹមត្រូវ និងឯកសារបេសកកម្មផ្លូវការជាដើម ដើម្បីជៀសវាងភាពមិនងាយស្រួលក្នុងការគ្រប់គ្រង។

ជាមួយគ្នានេះដែរ ប្រជាជនក្នុងស្រុកដែលស្នាក់នៅប្រទេសខាងលើដោយគ្មានហេតុផលត្រឹមត្រូវ គួរឆ្លៀតពេលត្រឡប់មកវិញជាបន្ទាន់ ហើយពន្យល់ពីហេតុផលរបស់ពួកគេទៅកាន់ភូមិ (សហគមន៍) និងប៉ុស្តិ៍ប៉ូលីស ដែលជាកន្លែងចុះបញ្ជីគ្រួសាររបស់ពួកគេ៕