ភ្នំពេញ៖ ធនាគារជាតិនៃកម្ពុជានៅថ្ងៃទី១២ ខែតុលា ឆ្នាំ២០២១នេះ បានប្រកាសលទ្ធផលនៃការដេញថ្លៃប្រាក់ដុល្លារអាមេរិក ចំនួន ៥០.០០០.០០០ ដុល្លារអាមេរិក ដោយមានគ្រឹះស្ថាន និងអាជីវករប្តូរប្រាក់ចូលរួមចំនួន ១៤, អត្រាអប្បបរមាដេញថ្លៃឈ្នះ៤.០៩៦រៀលក្នុងមួយដុល្លារអាមេរិក, ចំនួនទឹកប្រាក់ដេញថ្លៃបានឈ្នះសរុប :៥០.០០០.០០០ដុល្លារអាមេរិក។
បើតាមលោកជំទាវ ជា សិរី បានលើកឡើងថា ការដាក់ដេញថ្លៃនេះមានគោលបំណងពង្រឹងស្ថិរភាពអត្រាប្តូរប្រាក់ ដើម្បីចៀសវាងការប្រែប្រួលខ្លាំងនៃអត្រាប្តូរប្រាក់នៅប្រទេសកម្ពុជា។ លោកជំទាវសង្កេតឃើញថា ក្នុងបរិបទនៃសេដ្ឋកិច្ចកម្ពុជា ដែលមានទំនាក់ទំនងវិស័យសេដ្ឋកិច្ចខ្លាំងជាមួយពិភពលោក ការចាប់ផ្តើមរីករាលដាលនៃជម្ងឺកូវីដ១៩ក្នុងឆ្នាំ២០២០ បានជះឥទ្ធិពលអវិជ្ជមាន ដល់សកម្មភាពសេដ្ឋកិច្ចក្នុងស្រុក ក៏ដូចជាអត្រាប្តូរប្រាក់ ដែលកន្លងមកធនាគារជាតិនៃកម្ពុជាបានតាមដាន និងអនុវត្តឧបករណ៍នយោបាយរូបិយវត្ថុជាប្រចាំ ដើម្បីរក្សាស្ថិរភាពអត្រាប្តូរប្រាក់ និងគាំទ្រដល់ការងើបឡើងវិញនៃសកម្មភាពសេដ្ឋកិច្ច។
លោកជំទាវ ជា សិរី បានថ្លែងថា “បេសកកម្មចម្បងរបស់ធនាគារជាតិនៃកម្ពុជា គឺកំណត់ និងដឹកនាំគោលនយោបាយរូបិយវត្ថុ ក្នុងគោលដៅរក្សាស្ថិរភាពថ្លៃ សំដៅរួមចំណែកជំរុញការអភិវឌ្ឍសេដ្ឋកិច្ចជាតិ ដោយពិគ្រោះជាមួយក្រសួងសេដ្ឋកិច្ច និងហិរញ្ញវត្ថុ ក្នុងក្របខ័ណ្ឌនយោបាយសេដ្ឋកិច្ច និងហិរញ្ញវត្ថុកម្ពុជា។ ក្នុងបរិការនៃសេដ្ឋកិច្ចសាកលបច្ចុប្បន្ន ការធ្លាក់ថ្លៃនៃរូបិយវត្ថុ ឬសម្ពាធអត្រាប្តូរប្រាក់បានកើតឡើងស្ទើរជុំវិញពិភពលោក ពិសេសប្រទេសក្នុងតំបន់ ដោយសារការរីករាលដាល និងរលកថ្មីៗនៃជំងឺកូវីដ១៩”៕
