«ជនបរទេស»ជាង២ពាន់នាក់នៅខេត្តសៀមរាបសម្រុកទៅចាក់វ៉ាក់សាំងកូវីដ

សៀមរាប៖ រដ្ឋបាលខេត្តសៀមរាប នៅថ្ងៃទី ២០ កក្កដានេះបានចាប់ផ្តើមចាក់វ៉ាក់សាំងការពារជំងឺកូវីដ-១៩ ជូនដល់ជនបរទេសដោយដំណើរការចាក់វ៉ាក់សាំងការពារជំងឺកូវីដ-១៩ ដូសទី១ ជូនដល់ជនបរទេសទាំងអស់ដែលកំពុងស្នាក់នៅ និងកំពុងបំពេញការងារក្នុងខេត្តសៀមរាប។ ក្នុងនោះជនជាតិបរទេសប្រមាណ ២១២០នាក់ បានធ្វើសំណើរមកកាន់រដ្ឋបាលខេត្តសៀមរាប ដើម្បីទទួលបានចាក់វ៉ាក់សាំង។

លោក លីវ សុខុន ប្រធានមន្ទីរព័ត៌មានខេត្តសៀមរាប បានថ្លែងប្រាប់សារព័ត៌មានស៊ីស៊ីថាមស៍ថា ការចាក់វ៉ាក់សាំងការពារជំងឺកូវីដ-១៩ ដោយឥតគិតថ្លៃជូនជនបរទេសដែលកំពុងស្នាក់នៅក្នុងខេត្តសៀមរាប បានចាប់ដំណើរការហើយ នៅមន្ទីរពេទ្យបង្អែកខេត្តសៀមរាប នាព្រឹកថ្ងៃទី២០ ខែកក្កដា ឆ្នាំ២០២១នេះ។

លោក លីវ សុខុន បានបន្តថា ជនបរទេសជាង២ពាន់នាក់នៅខេត្តសៀមរាប សម្រុកទៅចុះឈ្មោះទទួលការចាក់វ៉ាក់សាំងការពារជំងឺកូវីដ-១៩ ហើយនេះបញ្ជាក់ថា ជនបរទេសមានការជឿទុកចិត្តចំពោះវ៉ាក់សាំងការពារជំងឺកូវីដ-១៩ ដែលរាជរដ្ឋាភិបាលកម្ពុជាបានផ្តល់ឲ្យដោយឥតគិតថ្លៃនេះ។

គួររម្លឹកថា យុទ្ធនាការចាក់វ៉ាក់សាំងជូនពលរដ្ឋនៅខេត្តសៀមរាប ជំហានទី១ បានចាប់ផ្តើមពីក្រុងសៀមរាប កាលពីថ្ងៃទី១០ ដល់ថ្ងៃទី២៣ ខែកក្កដា ឆ្នាំ២០២១ ខណៈតាមបណ្តាស្រុកទាំង១១ របស់ខេត្តសៀមរាប បានចាប់ផ្តើមកាលពីថ្ងៃទី១៤ ខែកក្កដា ២០២១៕