រូបភាព៖ រដ្ឋបាលខេត្ត
ភ្នំពេញ៖ កម្ពុជាកំពុងតែប្រឈមទៅនឹងការដើរហួសបន្ទាត់ក្រហម ប្រសិនបើបុគ្គល និងគ្រួសារ នៅតែមិនយកចិត្តទុកការពារខ្លួនពីជំងឺកូវីដ១៩។ នេះបើតាមការលើកឡើងរបស់ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការនៃក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩។
បើតាមលោកជំទាវ មានប្រសាសន៍ថា កម្ពុជាកំពុងតែប្រឈមទៅនឹងការដេីរហួសបន្ទាត់ក្រហម ហើយលោកជំទាវទទូចឱ្យប្រជាពលរដ្ឋគ្រប់រូប មិនថាបុគ្គល ឬក្រុមគ្រួសារទេ ត្រូវតែយកចិត្តទុកដាក់ និងប្រុងប្រយ័ត្នឱ្យបានខ្ជាប់ខ្ជួន ក្នុងការការពារពីជំងឺកូវីដ១៩។
លោកជំទាវមានប្រសាសន៍ថា៖« ខ្ញុំបានលេីកឡេីងនូវការបារម្ភ និងសុំឱ្យបងប្អូនយេីងងាកមករកការការពាររៀងៗខ្លួនឱ្យបានហ្មត់ចត់ឡេីងវិញ កុំបន្ធូរបន្ថយឱ្យសោះ បេីយេីងមិនចង់ឃេីញសោកនាដកម្មសុខភាពសាធារណ: ដែលវាអាចនឹងទៅហួសបន្ទាត់ក្រហមនោះទេ»។
ការលើកឡើងយ៉ាងដូច្នេះ ដោយសារតែកម្ពុជាមិនទាន់មានការធូរស្បើយពីជំងឺកូវីដ១៩ ខណៈចំនួនអ្នកឆ្លងក្នុងមួយថ្ងៃៗនៅតែបន្តមានគួរឱ្យកត់សម្គាល់។
លោកជំទាវបន្តថា កម្ពុជាក៏មានវីរុសដែលតា និងអាល់ហ្វា ដែលកំពុងមានវត្តមានក្នុងប្រទេស ហើយប្រភេទ អាល់ហ្វា ក៏កំពុងតែចរាចរខ្លាំងក្លា ទៅសឹងគ្រប់ខេត្ត-ក្រុងទៅហេីយ រីឯអ្នកស្លាប់ក៏មានជារៀងរាល់ថ្ងៃ។
ទន្ទឹមនឹងនេះ លោកជំទាវ ទទូចហើយទទូចទៀត ឱ្យមានការការពារកុំឱ្យឆ្លង ឫបេីឆ្លងហេីយត្រូវការពារកុំឱ្យឆ្លងបន្តទៅក្រុមគ្រួសារ និងអ្នកដទៃ ជាការចាំបាច់បំផុតក្នុងពេលនេះ។ ត្រូវភ្ញាក់រលឹកឡេីង បុគ្គលម្នាក់ៗ ត្រូវរួមគ្នាទទួលខុសត្រូវក្នុងការការពារការចម្លងវីរុសកូវីដ-១៩ ទោះជាប្រភេទណាក៏ដោយ ដេីម្បីសុខភាពខ្លួន សុខភាពគ្រួសារ និងសហគមន៍មានសុវត្ថិភាព៕
