.png?1741682398)
ភ្នំពេញ៖សត្វតោមួយក្បាលដែលអាជ្ញាធរកម្ពុជារឹបអូសយកទៅដាក់នៅមជ្ឈមណ្ឌលសង្គ្រោះសត្វព្រៃភ្នំតាម៉ៅនោះ ត្រូវបានដឹកមកដល់ផ្ទះវិញហើយ នៅរសៀលថ្ងៃទី ៥ កក្កដានេះ ក្រោយមានការអនុញ្ញាតពីសម្តេច ហ៊ុន សែន នាយករដ្ឋមន្ត្រីនៃកម្ពុជា។ក្នុងឱកាសនោះបុរសជនជាតិចិនដែលចិញ្ចឹមសត្វតោ បានអរគុណដល់សាធារណជន និងបានសន្យាថានឹងមើលថែ«សត្វតោ»ឱ្យល្អ។
លោក ឈី ស៊ែវ (Qi Xiao) ជាជនជាតិចិនដែលចិញ្ចឹមសត្វតោមួយក្បាល លោកបានអារម្មណ៍រំភើបជាខ្លាំង និងសូមអរគុណដល់សម្តេច ហ៊ុន សែន នាយករដ្ឋមន្ត្រីនៃកម្ពុជាក៏ដូចជាមហាជនខ្មែរដែលបានស្រឡាញ់គាំទ្រសត្វតោរបស់លោក។លោកឈីសន្យាថា នឹងមើលថែសត្វតោឱ្យល្អ ហើយលោកនឹងបើកឱ្យសាធារណជនចូលទស្សនាសត្វតោដោយឥតគិតថ្លែនៅពេលឆាប់ៗនេះផងដែរ។ជាមួយគ្នានេះ បើតាមលោក ឈី ស៊ែវ ជាការតបស្នងសងគុណដល់សម្តេច និងមហាជននៅពេលខាងមុខលោកនឹងព្យាយាមធ្វើសប្បុរសធម៌ជួយដល់ប្រជាពលរដ្ឋកម្ពុជាតាមលទ្ធភាពជាក់ស្តែង។
គួរបញ្ជាក់ថា កាលពីថ្ងៃទី ២៧ ខែមិថុនាឆ្នាំ ២០២១ អាជ្ញាធរចម្រុះរាជធានីភ្នំពេញ បានរឹបអូសសត្វតោចិញ្ចឹមមួយក្បាល នៅក្នុងផ្ទះវីឡាមួយកន្លែង ស្ថិតនៅ សង្កាត់បឹងកេងកង ១ រាជធានីភ្នំពេញ។ជាសត្វតោឈ្មោលមានអាយុ ១៨ ខែ និងទម្ងន់ ៧០ គីឡូក្រាម ត្រូវបានបញ្ជូនទៅកាន់មជ្ឍមណ្ឌលសង្គ្រោះសត្វព្រៃភ្នំតាម៉ៅ។
តែក្រោយមក សម្តេច ហ៊ុន សែន នាយករដ្ឋមន្ត្រីនៃកម្ពុជា នៅយប់ថ្ងៃទី០៤ កក្កដានេះ បានសម្រេចអនុញ្ញាតឱ្យម្ចាស់តោ យកតោទៅចិញ្ចឹមជាលក្ខណៈឯកជននៅផ្ទះ វិញ។ ការសម្រេចនេះ ក្រោយពីសម្តេចក្តាប់បានរឿងសត្វតោនេះជាប់ និងមានការសូមណូមពរពីសាធារណជន៕
.png?1744178821)
.jpg?1746601419)
