ចិន៖ យោងតាមរបាយការណ៍អង្គភាពស៊ើបអង្កេតផ្នែកសេដ្ឋកិច្ច（The Economist Intelligence Unit ）បានអោយដឹងថា ការធ្វើដំណើរកំសាន្តទៅក្រៅប្រទេសរបស់ទេសចរចិនអាចនឹងចាប់ផ្តើមឡើងវិញទាំងស្រុង គឺត្រូវរង់ចាំរហូតដល់ត្រីមាសទីមួយឆ្នាំ២០២៤។
បើតាមរបាយការណ៍អង្កេតរបស់អង្គភាពមួយនេះ បានគូសបញ្ជាក់ថា “យើងរំពឹងថា៖ ទិន្នន័យនៃការធ្វើដំណើរទៅក្រៅប្រទេសរបស់ទេសចរចិននឹងវិលត្រឡប់ទៅរកកម្រិតមុនជំងឺកូវីដ១៩រាតត្បាត គឺអាចនៅក្នុងត្រីមាសទី១ ឆ្នាំ២០២៤ ។”
របាយការណ៍ដដែលបាន អះអាងទៀតថា ទេសចរណ៍ធុរកិច្ចរបស់ប្រទេសចិនដែលមានចំនួន ៨% នៃទំហំទេសចរទៅក្រៅប្រទេសសរុប នឹងចាប់ផ្តើមងើបឡើងវិញនៅឆ្នាំ២០២២ខាងមុខនេះ។
ជាមួយគ្នានោះក្រុមអ្នកវិភាគជឿជាក់ថា ប្រព័ន្ធទិដ្ឋាការដែលមានសុវត្ថិភាព និងភាពងាយស្រួល នឹងក្លាយជាកត្តាសំខាន់នៃការសម្រេចចិត្តរបស់ទេសចរចិនក្នុងការជ្រើសរើសប្រទេសណាមួយ ដើម្បីធ្វើទេសចរណ៍។ពួកគេបាននិយាយថា៖ “ប្រទេសគោលដៅទេសចរណ៍ដែលងាយស្រួលបំផុតគឺជាប្រទេសទាំងឡាយណាដែលទទួលស្គាល់វ៉ាក់សាំងកូវីដ១៩របស់ប្រទេសចិន។”
គួរបញ្ជាក់ថា នៅមុនពេលមានរោគរាតត្បាតកូវីដ១៩ ប្រទេសចិនគឺជាប្រទេសនាំមុខគេក្នុងការចំណាយលើសេវាកម្មទេសចរណ៍។យោងតាមទិន្នន័យពីអង្គការទេសចរណ៍ពិភពលោកបានអោយដឹងថា៖ នៅក្នុងឆ្នាំ២០១៩ ភ្ញៀវទេសចរចិនដែលធ្វើទេសចរណ៍នៅក្រៅប្រទេសបានចំណាយប្រាក់រហូតដល់ ២៥៤៦០០ លានដុល្លារអាមេរិក៕
