ភ្នំពេញ៖ ក្រុមហ៊ុនកាសចរណ៍ឥណ្ឌា IndiGo បានប្រកាសពីការតភ្ជាប់ជើងហោះហើរត្រង់ឡើងវិញជាមួយប្រទេសកម្ពុជា ដែលនឹងចាប់ផ្តើមដំណើរការពីថ្ងៃទី០១ ខែតុលា ឆ្នាំ២០២៦។ការហោះហើរនេះ នឹងធ្វើឡើងរវាងកុលកាតា (CCU) មកកាន់ខេត្ត សៀមរាប (SAI) ចំនួន ៣ ជើង/ក្នុងមួយសប្តាហ៍ ពោលគឺរៀងរាល់ថ្ងៃចន្ទ ព្រហស្បតិ៍ និងសៅរ៍ ដោយប្រើប្រាស់យន្តហោះប្រភេទ Airbus A320neo (180/186 កៅអី)។
គួរបញ្ជាក់ថា ក្រុមហ៊ុនកាសចរណ៍ឥណ្ឌា IndiGo បានផ្តើមភ្ជាប់ជើងហោះហើរត្រង់ជាមួយកម្ពុជាដំបូង ក្នុងខែវិច្ឆិកា ឆ្នាំ២០២៥។តែត្រូវបានផ្អាកជាបណ្ដោះអាសន្ន។ចំពោះការតភ្ជាប់ឡើងវិញ នូវជើងហោះហើរត្រង់នេះនឹងផ្ដល់នូវកម្លាំងចលករយ៉ាងសំខាន់លើវិស័យស្នូលៗដូចជា៖ ទេសចរណ៍ និងបេតិកភណ្ឌ៖ បង្កលក្ខណៈងាយស្រួលដល់ភ្ញៀវទេសចរអន្តរជាតិ និងអ្នកធម្មយាត្រា មកទស្សនារមណីយដ្ឋានអង្គរ ដ៏ល្បីល្បាញលើពិភពលោក។
ទី២៖ ការផ្លាស់ប្តូររវាងប្រជាជន និងប្រជាជន៖ រឹតចំណងសាមគ្គីភាពកាន់តែជិតស្និទ្ធរវាងសិស្ស-និស្សិត ធុរជន ក្រុមគ្រួសារ និងអ្នកស្រឡាញ់វប្បធម៌នៃប្រទេសទាំងពីរ និង សហថាមពលពាណិជ្ជកម្ម៖ បើកឱកាសសម្រាប់ការផ្សព្វផ្សាយទេសចរណ៍រួមគ្នា កញ្ចប់ទស្សនកិច្ចទាក់ទាញ និងការពង្រីកការតភ្ជាប់ឆ្លងកាត់ទីក្រុងកុលកាតា។នេះបើយោងតាមការអះអាងរបស់ លោក ស៊ីន ចាន់សេរីវត្ថា រដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិល។
បើតាមលោក លោក ស៊ីន ចាន់សេរីវត្ថា បន្តថា និរន្តរភាពយូរអង្វែងនឹងអាស្រ័យលើតម្រូវការ ទីផ្សារជាក់ស្តែង សេវាកម្មប្រកបដោយទំនុកចិត្ត និង ការសហការផ្សព្វផ្សាយរួមគ្នាយ៉ាងសកម្ម។ ការស្ដារឡើងវិញ ច្រករបៀងអាកាសនេះនឹងចូលរួមចំណែកយ៉ាងសំខាន់ ក្នុងការជំរុញកំណើនសេដ្ឋកិច្ចប្រកបដោយចីរភាព។
លោកសង្កត់ធ្ងន់ថា កម្ពុជាបានត្រៀមខ្លួនរួចជាស្រេច ក្នុងការស្វាគមន៍ការវិលត្រឡប់មកវិញ នៃជើងហោះហើររបស់ក្រុមហ៊ុនអាកាសចរណ៍ IndiGo ព្រមទាំងផ្តល់កិច្ចសម្របសម្រួលប្រតិបត្តិការហោះហើរ ប្រកបដោយសុវត្ថិភាព ប្រសិទ្ធភាព និងទំនុកចិត្តខ្ពស់បំផុត៕
