ប៉េកាំង៖ ទីក្រុងប៉េកាំងនឹងហាមឃាត់ការកាន់កាប់យន្តហោះគ្មានមនុស្សបើក (drone) នៅក្នុងដែនដីទីក្រុងប៉េកាំង ក្រោមច្បាប់ថ្មីដែលនឹងចាប់ផ្តើមអនុវត្តនៅខែវិច្ឆិកា។ វិធានការនេះគឺជាការរឹតបន្តឹងបន្ថែមទៀតលើបទប្បញ្ញត្តិដែលមានស្រាប់ ដែលបានហាមឃាត់ការលក់ឧបករណ៍ទាំងនេះរួចទៅហើយ។ បើតាម South China Morning Post ច្បាប់ទាំងនេះត្រូវបានប្រកាសកាលពីថ្ងៃអាទិត្យ (ទី១៣ ខែកញ្ញា) ហើយនឹងចូលជាធរមាននៅថ្ងៃទី១៥ ខែវិច្ឆិកា ដោយហាមឃាត់ការកាន់កាប់ ឬការរក្សាទុកយន្តហោះគ្មានមនុស្សបើក (UAVs) និងហាមឃាត់ការហោះហើរនៅក្នុងដែនអាកាសរបស់ទីក្រុងប៉េកាំង។
South China Morning Post បានរាយការណ៍ទៀតថា ការដឹកជញ្ជូនយន្តហោះគ្មានមនុស្សបើក ឬគ្រឿងបន្លាស់របស់ពួកវាចូលទៅក្នុងទីក្រុងប៉េកាំង ក៏នឹងត្រូវបានហាមឃាត់ផងដែរ ដោយការហាមឃាត់នេះគឺឆ្លើយតបជាមួយនឹងការព្រួយបារម្ភអំពីសុវត្ថិភាពដែនអាកាសនៅក្នុងទីក្រុងដែលមានប្រជាជន ២២ លាននាក់នេះ ក្រោយពីមានឧបទ្ទវហេតុមួយបានឡើងកាលពីខែមិថុនា នៅពេលដែលយន្តហោះតូចមួយគ្រឿងបានធ្លាក់ចូលទៅក្នុងអគារខ្ពស់បំផុតរបស់ទីក្រុង ដោយបានសម្លាប់អ្នកបើកបរ និងបណ្តាលឱ្យមនុស្ស ១៣ នាក់ផ្សេងទៀតរងរបួស។ បទប្បញ្ញត្តិទាំងនេះ ដែលត្រូវបានរៀបចំឡើងដោយរដ្ឋបាលក្រុងប៉េកាំង បានលើកឡើងពីតម្រូវការក្នុងការ ការពារសន្តិសុខរបស់រដ្ឋធានី។
បទប្បញ្ញត្តិថ្មីនេះតម្រូវឱ្យម្ចាស់យន្តហោះគ្មានមនុស្សបើកទាំងអស់ត្រូវកម្ទេចចោល ឬផ្លាស់ទីឧបករណ៍របស់ពួកគេចេញពីទីក្រុងប៉េកាំងត្រឹមថ្ងៃទី១៥ ខែវិច្ឆិកា បើមិនដូច្នេះទេ ពួកគេនឹងប្រឈមមុខនឹងការរឹបអូស និងការផាកពិន័យ អាជ្ញាធរនឹងផ្តល់ប្រាក់ឧបត្ថម្ភដល់ម្ចាស់ឧបករណ៍ដែលបាន កម្ទេចឧបករណ៍របស់ពួកគេ។ជម្រើសមួយទៀត ពួកគេនឹងទទួលបានសេវាដឹកជញ្ជូនដោយឥតគិតថ្លៃ បើផ្ញើឧបករណ៍ទាំងនោះចេញពីទីក្រុងប៉េកាំង៕
