.jpg?1788173074)
ភ្នំពេញ៖ អគ្គស្នងការដ្ឋាននគរបាលជាតិ នៃក្រសួងមហាផ្ទៃ និងធនាគារ កាណាឌីយ៉ា នៅថ្ងៃទី៣១ ខែសីហា ឆ្នាំ២០២៦ បានចុះហត្ថលេខាលើអនុស្សរណៈយោគយល់គ្នាសី្តពីការប្រើប្រាស់សេវាកម្មធនាគារ កាណាឌីយ៉ា សម្រាប់ប្រតិបតិ្តការបង់ប្រាក់ ពិន័យបទល្មើសច្បាប់សី្តពីចរាចរណ៍ផ្លូវគោក។ពិធីនេះ រៀបចំឡើងដោយមានលោក ឧត្តមសេនីយ៍ឯក ចេវ ហាក់ អគ្គស្នងការរងនគរបាលជាតិ និង លោកស្រី ឈាង សោភា នាយិកានាយកដ្ឋានសេវាកម្មហិរញ្ញវត្ថុបុគ្គល នៃធនាគារ កាណាឌីយ៉ា តំណាងដ៍ខ្ពង់ខ្ពស់លោកអ្នកឧកញ៉ាបណ្ឌិត ពុង ឃាវសែ ប្រធានក្រុមប្រឹក្សាភិបាល។
ឧត្តមសេនីយ៍ឯក ចេវ ហាក់ បានថ្លែងថា MOUនេះ ដើម្បីធ្វើកិច្ចសហការក្នុងការបង់ប្រាក់ពិន័យអំពើល្មើសច្បាប់ស្តីពីចរាចរណ៍ផ្លូវគោក គឺជាផ្នែកមួយនៃការធ្វើកំណែទម្រង់ក្នុងការគ្រប់គ្រង នៃការជួយសម្រួលដល់ប្រជាពលរដ្ឋ និងបង្កើនប្រសិទ្ធភាព ក្នុងការរឹតបន្តឹងអនុវត្តច្បាប់ចរាចរណ៍ផ្លូវគោក សំដៅសម្រេចនូវគោលដៅចុងក្រោយ គឺការធ្វើចរាចរណ៍ប្រកបដោយការគោរពច្បាប់គ្មានអំពើល្មើស និងមានសុវត្ថិភាព។លោក សង្ឃឹមថានឹងបង្កភាពកាន់តែងាយស្រួលដល់ប្រជាពលរដ្ឋក្នុងការបង់ប្រាក់ពិន័យអន្តការណ៍ចំពោះអំពើល្មើសច្បាប់សី្តពីចរាចរណ៍ផ្លូវគោក ធនាគារ កាណាឌីយ៉ា និងចូលរួមបម្រើសេវាកម្មក្នុងការបង់ប្រាក់ពិន័យអំពើល្មើសច្បាប់ស្តីពីចរាចរណ៍ផ្លូវគោក។
.jpg?1788172942)
លោកស្រី ឈាង សោភា នាយិកានាយកដ្ឋានសេវាកម្មហិរញ្ញវត្ថុបុគ្គល នៃធនាគារ កាណាឌីយ៉ា មានប្រសាសន៍ថា៖ ពិធីចុះហត្ថលេខាលើអនុស្សរណៈនៃការយោគយល់គ្នានាថ្ងៃនេះ គឺជាការបោះជំហានថ្មីរួមគ្នាមួយទៀតក្នុងការលើកកម្ពស់បរិវត្តកម្មឌីជីថល និងការធ្វើទំនើបកម្មទូទាត់ផ្នែកសេវាសាធារណៈជាមួយបច្ចេកវិទ្យាហិរញ្ញវត្ថុទំនើប ស្របតាម យុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាល ដែលបានកំណត់យក "បច្ចេកវិទ្យា" ជាអាទិភាពគន្លឹះ។
.jpg?1788173089)
លោកស្រីថា "យើងខ្ញុំបានត្រៀមខ្លួនរួចជាស្រេចក្នុងការផ្តល់ជូននូវដំណោះស្រាយទូទាត់ដ៏សម្បូរបែប ដែលមានសុវត្ថិភាព រហ័ស ប្រកបដោយប្រសិទ្ធភាព និងតម្លាភាព រួមមាន៖ កម្មវិធីទូរស័ព្ទដៃ Canadia Bank App, សេវាធនាគារសាជីវកម្មតាមអ៊ីនធឺណិត (Corporate Internet Banking) ការស្កេនទូទាត់ KHQR នៅលើកម្មវិធីទូរស័ព្ទ គេហទំព័រ និង បង្កាន់ដៃពិន័យ ព្រមទាំងនៅតាមបណ្តាញបញ្ជរសាខាធនាគារ កាណាឌីយ៉ា នៅទូទាំងប្រទេស ដើម្បីជួយសម្រួលដល់ប្រជាពលរដ្ឋក្នុងការបំពេញកាតព្វកិច្ចផ្លូវច្បាប់ឱ្យកាន់តែងាយស្រួល ចំណេញពេលវេលា និងអាចធ្វើប្រតិបត្តិការបានគ្រប់ពេលវេលា និងគ្រប់ទីកន្លែង។
ក្នុងពីថ្ងៃទី០១ ខែកញ្ញា ឆ្នាំ២០២៦ នេះអគ្គស្នងការដ្ឋាននគរបាលជាតិនឹងអនុញ្ញាតឱ្យអ្នកដែលទទួលរងពិន័យចំពោះអំពើល្មើសច្បាប់ស្តីពីចរាចរណ៍ផ្លូវគោក ជ្រើសយកការបង់ប្រាក់ពិន័យតាម KHQR ធនាគារ កាណាឌីយ៉ា ឬនៅស្នាក់ការនគរបាលចរាចរណ៍ផ្លូវគោក៕
.jpg?1788173104)
.jpg?1788173112)
