ភ្នំពេញ៖ការស្នើរសុំគោលការណ៍អនុញ្ញាតកាត់ផ្ទៃបឹងតាមោក(បឹងកប់ស្រូវ)ចំនួនប្រមាណ ៣០ហិកតា ត្រូវបានលោក ហ៊ុន សែន នាយករដ្ឋមន្ត្រីនៃកម្ពុជា បានដកហូត និងលុបចោលនូវសំណើរគ្រោងលុបបំពេញបឹងតាមោក។ នេះបើតាមយោងតាមលិខិតលេខ០០១ ខន/០២១ សជណ ចុះថ្ងៃទី៤ ខែមករា ឆ្នាំ២០២១នេះ។
តាមសេចក្ដីដែលទីស្តីការគណៈរដ្ឋមន្រ្តីបានឱ្យដឹងថា រាជរដ្ឋាភិបាលបានសម្រេចចំពោះនិរាករណ៍លិខិតលេខ ៧៩០ សជណ.មយ ចុះថ្ងៃទី១ ខែកញ្ញា ឆ្នាំ២០២០ ដែលបានស្នើរសុំគោលការណ៍អនុញ្ញាតកាត់ផ្ទៃបឹងតាមោក(បឹងកប់ស្រូវ)ដែលមានទីតាំងនៅខណ្ឌព្រែកព្នៅ រាជធានីភ្នំពេញ ក្នុងនោះមានមួយកន្លែងទំហំ១៥ហិកតា សម្រាប់សាងសង់អគារទីស្តីការក្រសួងអភិវឌ្ឍន៍ជនបទ និងនិរាករណ៍អនុក្រឹត្យលេខ១៣៨ អនក្រ.បក ចុះថ្ងៃទី១ ខែកញ្ញា ឆ្នាំ២០២០ ស្ដីពីការកែសម្រួលផ្ទៃបឹងតាមោក(បឹងកប់ស្រូវ)ស្ថិតនៅរាជធានីភ្នំពេញ។
មួយកន្លែងទៀតទំហំ១៥ហិកតា សម្រាប់សាងសង់អគារចំនួនបីគឺ អគារគណៈកម្មាធិការជាតិគ្រប់គ្រងគ្រោះហន្តរាយ អគារគណៈកម្មាធិការ សិទ្ធិមនុស្ស និងអគារអាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្រ្គោះជនពិការដោយសារមីន និងនិរាករណ៍អនុក្រឹត្យលេខ១៣៩ អនក្រ.បក ចុះថ្ងៃទី១ ខែកញ្ញា ឆ្នាំ២០២០ ស្ដីពីការកែសម្រួលផ្ទៃបឹងតាមោក(បឹងកប់ស្រូវ)ស្ថិតនៅរាជធានីភ្នំពេញ។
សូមបញ្ជាក់ថា បឹងតាមោក (បឹងកប់ស្រូវ) ស្ថិតនៅរាជធានីភ្នំពេញ ត្រូវបានគ្រប់គ្រង ដោយអនុក្រឹត្យលេខ ២០ អនក្រ.បក ចុះនៅថ្ងៃទី២០ ខែកុម្ភៈ ឆ្នាំ២០១៦ កំណត់ទំហំផ្ទៃបឹងសរុបប្រមាណជាង០៣ពាន់ហិកតា (៣២៣៩, ៧ហិកតា) ក្នុងរាជធានីភ្នំពេញ ជាសម្បត្តិសាធារណៈរបស់រដ្ឋ៕
