ការដាក់ពង្រាយសំណង់ជម្រកត្រីសិប្បនិម្មិត(FPS) កើនដល់ចំនួន ១, ៤៧០ ឈុត គិតត្រឹមខែមិថុនា ឆ្នាំ២០២៦

ភ្នំពេញ៖ ការដាក់ពង្រាយសំណង់ជម្រកត្រីសិប្បនិម្មិត (Fisheries Productivity Structure – FPS) បានកើនពីចំនួន ១,២៥០ ឈុតដែលបានរាយការណ៍កាលពីខែមេសានេះ ដល់ចំនួន ១, ៤៧០ ឈុត គិតត្រឹមខែមិថុនា ឆ្នាំ២០២៦។ សំណង់ជម្រកត្រីសិប្បនិម្មិតនេះ បង្កើតជាជម្រកសមស្រប សម្រាប់ការបន្តពូជ និងការលូតលាស់នៃធនធានជលផលសមុទ្រ។ នេះបើតាមរបាយការណ៍ពីគម្រោងជលផលសមុទ្រ និងតំបន់ឆ្នេរប្រកបដោយចីរភាព SCMF។

គម្រោងជលផលតំបន់ឆ្នេរ និងសមុទ្រប្រកបដោយចីរភាព (SCMF) កំពុងដាក់ពង្រាយ សំណង់ជម្រកត្រីសិប្បនិម្មិត (FPS) ដើម្បីគាំទ្រដល់ការស្ដារឡើងវិញ និងការការពារប្រព័ន្ធអេកូឡូស៊ីសមុទ្រ។ សំណង់ជម្រកត្រីសិប្បនិម្មិត ទាំងនេះ ត្រូវបានរចនាឡើងដើម្បីកាត់បន្ថយការនេសាទដោយប្រើឧបករណ៍អូសបំផ្លិចបំផ្លាញ និងបង្កើតជាជម្រកសមស្រប សម្រាប់ការបន្តពូជ និងការលូតលាស់នៃធនធានជលផលសមុទ្រ។

សមិទ្ធផលនេះឆ្លុះបញ្ចាំងពីកិច្ចសហការដ៏ល្អរជាមួយ រវាងគម្រោង និងអង្គការ MCC (Marine Conservation Cambodia) ដោយមានការចូលរួម ពីសហគមន៍នេសាទ សម្រាប់ការ ដំឡើង និងទម្លាក់ FPS នៅតាមទីតាំងដែលបានគ្រោងទុក។

គួរបញ្ជាក់ថា សំណង់ជម្រកត្រីសិប្បនិម្មិតកាន់តែច្រើន ជម្រកសត្វសមុទ្រកាន់តែរឹងមាំ។ នេះជាមូលដ្ឋានគ្រឹះ សម្រាប់វិស័យជលផលសមុទ្រប្រកបដោយចីរភាព និងជីវភាពរស់នៅរបស់សហគមន៍តំបន់ឆ្នេរ៕