ភ្នំពេញ៖ ស្ថានីយ៍ទូរទស្សន៍ដ៏ធំនៅកម្ពុជា «PNN» នឹងប្រកាសបិទទ្វាទាំងស្រុង នៅថ្ងៃទី១ ឧសភា ២០២៦នេះ ក្រោយពីបើកដំណើរបានរយៈពេលជាង ១០ឆ្នាំ ពោលគឺចាប់តាំងពីឆ្នាំ ២០១៥មក។មូលហេតុចម្បងដែលឈានដល់ការសម្រេចបិទទ្វាទាំងស្រុងនេះ គឺដោយសារបញ្ហាហិរញ្ញវត្ថុ។នេះបើយោងតាមការប្រកាសពីលោក នេត្រ ភក្ត្រា រដ្ឋមន្រ្តីក្រសួងព័ត៌មាន ថ្លែងក្នុងសន្និសីទសារព័ត៌មាន ពីស្ថានភាពសេរីភាពសារព័ត៌មាននៅកម្ពុជា ឆ្នាំ២០២៦។
ស្ថានីយ៍ទូរទស្សន៍ PNN បោះទុនវិនិយោគដោយលោកអ្នកឧកញ៉ា លី យ៉ុងផាត់ ក្នុងទំហំទឹកប្រាក់សរុបប្រមាណជា៤០លានដុល្លារ និងបានបើកដំណើរការនៅថ្ងៃទី១១ ខែកក្កដា ឆ្នាំ២០១៥ នៅឯសណ្ឋាគារភ្នំពេញ និងមានការចូលរួមពីសំណាក់មន្ត្រីជាន់ខ្ពស់ក្នុងជួររដ្ឋាភិបាលនៃព្រះរាជាណាចក្រកម្ពុជា។ស្ថានីយ៍ទូរទស្សន៍ដ៏ធំមួយនេះ មានទីតាំងក្នុងខណ្ឌជ្រោយចង្វា ជាយរាជធានីភ្នំពេញ ហើយការពីបើកដំណើរការដំបូងមានបុគ្គលិកប្រមាណជាង៣០០នាក់។
យោងតាមប្រភពពីបុគ្គលិក PNN សុំមិនបញ្ចេញឈ្មោះបានប្រាប់ ស៊ីស៊ីថាមស៍ ថា ក្រុមហ៊ុនបានជូនដំណឹងដល់បុគ្គលិកអំពីការបិទស្ថានីយ៍ទូរទស្សន៍ទាំងស្រុងគ្រប់កម្មវិធីទាំងអស់ នៅថ្ងៃទី ១ ឧសភា ឆ្នាំ២០២៦ ក្រោយចូលឆ្នាំខ្មែរ និង ឱ្យបុគ្គលិកស្វែងរកការងារធ្វើថ្មី។ការបិទនេះ ធ្វើឡើងក្រោយពេលក្រុមហ៊ុនទើបតែជម្រុះបុគ្គលិក ដោយសារមិនអាចទ្រទ្រង់ផ្នែកហិរញ្ញវត្ថុរួច។
លោក ពុយ គា ប្រធានក្លិបអ្នកកាសែតកម្ពុជា បានថ្លែងចាត់ទុក ការបិទទ្វារបស់ស្ថានីយ៍ទូរទស្សន៍ដ៏ធំនៅកម្ពុជា «PNN» គឺជាចរន្តរបស់ពិភពលោក សម្រាប់ប្រព័ន្ធផ្សាយផ្សាយបែបប្រពៃណី ដែលបានបិទទ្វាដោយសារបញ្ហាហិរញ្ញវត្ថុ។ការបិទទ្វានេះ ក៏មានការរួចចំណែកពីការរីកចម្រើននៃបណ្តាញសង្គមបច្ចុប្បន្ន ដោយមនុស្សម្នាក់ៗអាចធ្វើការផ្សព្វផ្សាយដើរតួរជំនួសផ្នែកទីផ្សារ រដ្ឋបាលផ្សេង ដែលនាំឱ្យសារព័ត៌មានអាជីពបាត់បង់ការងារ និងក្លាយជាបញ្ហាប្រឈម៕
.JPG?1777430590)
