ភ្នំពេញ៖ រដ្ឋមន្ត្រីក្រសួងទេសចរណ៍កម្ពុជា លោក ហួត ហាក់ បានស្នើឱ្យរដ្ឋបាលរាធានី ខេត្តនីមួយៗ បង្កើត អត្តសញ្ញាណពិសេសផ្ទាល់របស់រាជធានី ខេត្តនីមួយៗ (Branding) ឱ្យមានភាពទោល លេចធ្លោ និង ពិសេសរបស់ រាជធានីខេត្តនីមួយៗ ពីព្រោះគឺជាតម្លៃបន្ថែមខ្ពស់ក្នុងវិស័យទេសចរណ៍ ដើម្បីទាក់ទាញភ្ញៀវទេសចរជាតិ និង អន្តរជាតិ មកកាន់ខេត្តរបស់ខ្លួន ឱ្យបានកាន់តែច្រើនបន្ថែមទៀត។
ការស្នើសុំនេះ ធ្វើឡើងក្នុងសិក្ខាសាលាស្តីពី “ការអភិវឌ្ឍ និងគ្រប់គ្រងទេសចរណ៍”ដោយមានវត្តមាន ក្រសួងស្ថាប័នអន្តរវិស័យ តំណាងរដ្ឋបាលរាជធានី-ខេត្ត មន្ទីរទេសចរណ៍ទាំង២៥រាជធានី-ខេត្ត មន្ទីរអង្គភាពជុំវិញខេត្ត មន្ត្រីរាជការ វិស័យឯកជន ដៃគូអភិវឌ្ឍ ប្រតិបត្តិករ សេវាករទេសចរណ៍ ម្ចាស់អាជីវកម្មសមាគមទេសចរណ៍ សមាគមយុវជន សិស្ស និស្សិត អ្នកផលិតមាតិកា Influencers និងអ្នកពាក់ព័ន្ធក្នុងវិស័យទេសចរណ៍ សរុបប្រមាណជាង៥០០នាក់។
យោងតាមលោក ហួត ហាក់ បានគូសរំលេចបន្ថែមថា ក្នុងឆ្នាំ២០២៥ កន្លងទៅ កម្ពុជាបានទទួលទេសចរអន្តរជាតិសរុប ៥,៥៧លាននាក់ ជាមួយទេសចរជាតិប្រមាណ ២៥,១៦លាននាក់ កើនឡើង ១១,៧% និង ចំណូលទេសចរអន្តរជាតិ ៣,៨៧៨ លានដុល្លារអាម៉េរិក កើនឡើង ៦,៦%។
ដើម្បីរួមចំណែកអភិវឌ្ឍវិស័យទេសចរណ៍ប្រកបដោយចីរភាព ភាពធន់ និងបរិយាបន្ន លោករដ្ឋមន្ត្រី បានស្នើឱ្យគ្រប់ភាគីពាក់ព័ន្ធទាំងថ្នាក់ជាតិ និងថ្នាក់ក្រោមជាតិ រួមគ្នាលើកកម្ពស់ការផ្សព្វផ្សាយទេសចរណ៍ ឱ្យបានកាន់តែទូលំទូលាយថែមទៀត ស្របតាមទិសស្លោក “ទេសចរណ៍ដើម្បីទាំងអស់គ្នា ទាំងអស់គ្នាដើម្បីទេសចរណ៍” ដែលបានដាក់ចេញដោយសម្តេច ហ៊ុន សែន “ទេសចរណ៍រីកលូតលាស់ក្នុងសន្តិភាព” ដែលបានដាក់ចេញដោយសម្តេចនាយករដ្ឋមន្ត្រី និង “បុគ្គលម្នាក់ៗជាអ្នកផ្សព្វផ្សាយទេសចរណ៍កម្ពុជាម្នាក់” ដែលបានដាក់ចេញដោយមហាគ្រួសារវិស័យទេសចរណ៍។
សម្រាប់លោករដ្ឋមន្រ្តី អំពាវនាវ ឱ្យរដ្ឋបាលរាជធានី ខេត្ត និងគ្រប់ភាគីពាក់ព័ន្ធទាំងអស់ យកចិត្តទុកដាក់លើការអត្ថាធិប្បាយនិទានរឿង (Story telling) នៃសក្តានុពលទេសចរណ៍នីមួយៗ (តំបន់សក្តានុពលទេសចរណ៍, ម្ហូបអាហារ, ជំនឿ, ទំនៀមទំលាប់,...) ឱ្យមានភាពទាក់ទាញអារម្មណ៍ និងរស់រវើក ធ្វើឱ្យភ្ញៀវទេសចរ ចង់មកទស្សនាកម្សាន្ត, ចង់ស្គាល់, ចង់ឃើញ, ចង់ភ្លក្ស, ចង់សាកល្បងបទពិសោធន, ចង់ស្នាក់នៅកាន់តែយូរ, និង ចង់មកទស្សនាម្តងទៀត»៕
