ភូមិឋានពលរដ្ឋខ្មែរ៣៧១ភូមិរងផលប៉ះពាល់ដោយគ្រាប់បែកចង្កោមរបស់ថៃសរុបជាផ្ទៃដី២,៣៦០គីឡូម៉ែត្រក្រឡា

ភ្នំពេញ៖ យ៉ាងហោចណាស់មាន ភូមិឋានរបស់ជនស៊ីវិលកម្ពុជា ចំនួន ៣៧១ភូមិ ត្រូវបានរកឃើញថា រងផលប៉ះពាល់ដោយសារការទម្លាក់គ្រាប់បែកចង្កោមរបស់ក្រុមយោធាថៃ លើដែនអធិបតេយ្យរបស់កម្ពុជា។ភូមិទាំងអស់នោះ គឺក្នុងខេត្តចំនួន៦របស់កម្ពុជាតាមបណ្តោយព្រំដែនខ្មែរ-ថៃ។នេះបើយោងតាមរបាយការណ៍ស្រាវជ្រាវរបស់មជ្ឈមណ្ឌល​សកម្មភាព​កម្ចាត់មីន​កម្ពុជា (CMAC)។

ខេត្តទាំង៦នោះមានជាអាទិ៍៖ ខេត្តកោះកុង​ ពោធិ៍សាត់​ បាត់ដំបង​ បន្ទាយមានជ័យ​ ឧត្តរមានជ័យ​ និង ខេត្តព្រះវិហារ និង​ រួមទាំងខេត្តសៀមរាបផង ត្រូវបាន​ កំណត់តំបន់រងផលប៉ះពាល់ដោយគ្រាប់បែកចង្កោមចំនួនប្រមាណ ៣,៦០០ ពហុកោណ​ (ទីតាំង)​ មានផ្ទៃដីសរុបប្រមាណ ២,៣៦០គីឡូម៉ែត្រក្រឡា។ហើយភាគច្រើនគ្រាប់បែកចង្កោមទាំងនេះ បាញ់ផ្លោងមកលើទីតាំងពលរដ្ឋស៊ីវិលដូចជា៖លំនៅឋានប្រជាពលរដ្ឋ​ ដីស្រែចម្ការ​ សាលារៀន​ មន្ទីរពេទ្យ​ ជាដើម។

បើតាម CMAC ប្រភេទគ្រាប់បែកចង្កោមដែលយោធាថៃប្រើ ដើម្បីបាញ់ប្រហារឈ្លានពានលើដែនអធិបតេយ្យកម្ពុជា មានចំនួន៣ប្រភេទ គឺ​ M42​ M46 និង​M85។ប្រភេទទាំងនេះ យោធាថៃអាចប្រើគ្រាប់បែកចង្កោមកាំភ្លើធំប្រភេទ 155MM មានចំនួនប្រមាណ ១២០,០០០ ទៅ១៣០,០០០គ្រាប់​ មានកូនគ្រាប់បែកចង្កោមប្រមាណពី៦លានទៅ៧លានគ្រាប់។គ្រាប់បែកចង្កោមប្រភេទស៊េរី M មានប្រើក្នុងសង្គ្រាមនៅប្រទេសមួយចំនួនដូចជានៅលីបង់​ ស៊ីរី​ អ៊ុយក្រែន​ និង យេមែន​ ជាដើម៕