ភ្នំពេញ៖ អាជ្ញាធររាជធានីភ្នំពេញ នៅថ្ងៃទី ១៨ មករានេះ បានចាប់ផ្តើមរៀបចំលាងសម្អាតអនាម័យ មហាវិថីម៉ៅសេទុង មហាវិថីព្រះមុន្នីរ៉េត ផ្លូវ២៣០ និង តំបន់ជុំវិញពាក់ព័ន្ធផ្សារដើមគ ដើម្បីតៀមរៀបចំជួសជុល និង កែលម្អហេដ្ឋារចនាសម្ព័ន្ធជុំវិញនោះ។ការសម្រេចនេះ ធ្វើឡើងខណៈឱសានវាទនៃការហាមឃាត់លក់ដូរបានចូលជាធរមាន ចាប់ពីថ្ងៃទី ១៨ មករា ឆ្នាំ២០២៦នេះ។
គួរបញ្ជាក់ថា អាជ្ញាធររាជធានីភ្នំពេញ ចាប់ពីថ្ងៃទី១៨ ខែមករា ឆ្នាំ២០២៦នេះតទៅ នឹងរៀបចំសម្អាតអនាម័យនៅតាមមហាវិថីម៉ៅសេទុង មហាវិថីព្រះមុន្នីរ៉េត ផ្លូវ២៣០ និង តំបន់ជុំវិញពាក់ព័ន្ធ ជាពិសេសគឺរៀបចំជួសជុល និងកែលម្អហេដ្ឋារចនាសម្ព័ន្ធឱ្យល្អប្រសើរឡើងវិញ.
ក្នុងប្រតិបត្តិការនេះ អាជ្ញាធររាជធានីភ្នំពេញ មិនអនុញ្ញាតឱ្យមានការលក់ដូរឥតសណ្ដាប់ធ្នាប់រំលោភចិញ្ចេីមផ្លូវ និង ទ្រូងផ្លូវសាធារណៈ នៅមហាវិថីមុនីរ៉េត មហាវិថីម៉ៅសេទុង និង តំបន់ជុំវិញផ្សារដេីមគ។
លោកស្រី ដោ សម្ផស្ស អ្នកនាំពាក្យរដ្ឋបាលរាជធានីភ្នំពេញ បានទទូចជាថ្មីដល់ក្រុមអាជីវករមួយចំនួនតូចមកទទួលយក ការសម្របសម្រួលពីអាជ្ញាធររាជធានី ដើម្បីចូលរួមក្នុងការរៀបចំសណ្តាប់ធ្នាប់ និង របៀបរៀបរយ ក៏ដូចជាការកែលម្អរសោភ័ណ្ឌភាពទីក្រុង ស្របទៅនឹងអ្វីដែលរាជធានីភ្នំពេញ ទទួលបានចំណាប់ថ្នាក់ ជាទីក្រុងគោលដៅទេសចរណ៍ល្អបំផុត ក្នុងចំណោមទីក្រុងធំៗទាំង២០ជុំវិញពិភពលោក សម្រាប់ឆ្នាំ២០២៦។
បើតាមលោកស្រី ដោ សម្ផស្ស ទីតាំងផ្សារដើមគថ្មី ក្រុមអាជីវករទទួលបានអត្ថប្រយោជន៍ជាច្រេីនមានជាអាទិ៍ អនុគ្រោះ ពុំមានការបង់ថ្លៃតូប រហូតដល់២ឆ្នាំ ពុំតម្រូវប្រាក់កក់ ហើយក្រោយ ២ឆ្នាំ តម្លៃតូបត្រឹមតែ៣០ដុល្លារ និងប្រេីទឹកភ្លេីង ដោយឥតគិតថ្លៃរហូតដល់៦ខែ។ទីតាំងនេះស្ថិតនៅតាមបណ្តោយ មហាវិថីឈ្នះ-ឈ្នះ ក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ និង ត្រូវប្រសិទ្ធនាមថា មជ្ឈមណ្ឌលពាណិជ្ជកម្ម អាស៊ាន-អន្តរជាតិ ឬផ្សារដើមគរថ្មី៕
