ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ និងអង្គការបណ្តុះបណ្តាល និងវឌ្ឍនភាពកម្ពុជា នាថ្ងៃទី៧ ខែតុលា ឆ្នាំ២០២៥ បានចុះហត្ថលេខាលើកិច្ចព្រមព្រៀង ដើម្បីជំរុញការបណ្តុះបណ្តាលជំនាញវិជ្ជាជីវៈ ផ្នែកបដិសណ្ឋារកិច្ច និងទេសចរណ៍ដល់យុវជនកម្ពុជា ជួយគាំទ្រ និងបណ្តុះបណ្តាលធនធានមនុស្សក្នុងវិស័យបដិសណ្ឋារកិច្ចនៅកម្ពុជា។
លោកហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងលោក ហ្វ្រាង់ស្វ័រ ស្លូវបេលែន នាយកសាលាសណ្ឋាគារ និងទេសចរណ៍ ប៉ូល ឌុយប្រ៊ូល តំណាងអង្គការបណ្តុះបណ្តាល និងវឌ្ឍនភាពកម្ពុជា (ONG Formation Et Progres Cambodge) បានចុះហត្ថលេខាលើកិច្ចព្រមព្រៀងគម្រោង ស្តីពីសាលាសណ្ឋាគារ និងទេសចរណ៍ ប៉ូល ឌុយប្រ៊ូល កាលពីថ្ងៃទី៧ ខែតុលា ឆ្នាំ២០២៥ ដើម្បីជំរុញការបណ្តុះបណ្តាលជំនាញវិជ្ជាជីវៈផ្នែកបដិសណ្ឋារកិច្ច និងទេសចរណ៍។
លោករដ្ឋមន្រ្តីបានវាយតម្លៃខ្ពស់ចំពោះ អង្គការបណ្តុះបណ្តាល និងវឌ្ឍនភាពកម្ពុជា តាមរយៈសាលាសណ្ឋាគារ និងទេសចរណ៍ ប៉ូលឌុយប្រ៊ូល លើការបណ្តុះបណ្តាលជំនាញវិជ្ជាជីវៈ ផ្នែកបដិសណ្ឋារកិច្ច និងទេសចរណ៍ដល់យុវជនកម្ពុជា។ សិស្សនិសិ្សតដែលបញ្ចប់ការសិក្សាប្រកបដោយជំនាញវិជ្ជាជីវៈច្បាស់លាស់ គឺជាធនធានដ៏សំខាន់ដែលមិនត្រឹមតែងាយស្រួល ក្នុងការរកការងារសមរម្យប៉ុណ្ណោះទេ ថែមទាំងបានចូលរួមលើកកម្ពស់វិស័យទេសចរណ៍ថែមទៀតផង។
.jpg?1759897754)
ជាការឆ្លើយតប លោក ហ្វ្រាង់ស្វ័រ ស្នូលេលែន បានវាយតម្លៃខ្ពស់ និងអរគុណក្រសួងការងារ និងបណ្តុះបណ្តាលវិជ្ជាជីវៈ ដែលតែងតែបានគាំទ្រ អង្គការនាពេលកន្លងមកលើការងារបណ្តុះបណ្តាលធនធានមនុស្សក្នុងវិស័យបដិសណ្ឋារកិច្ច ហើយអង្គការរបស់លោកក៏បានប្តេជ្ញាចិត្តក្នុងការបន្តកម្មវិធីបណ្តុះបណ្តាលជំនាញដល់យុវជនកម្ពុជាឱ្យកាន់តែមានគុណភាពបន្ថែមទៀត៕
.jpg?1778143461)
