សៀមរាប៖ អយ្យការអមសាលាដំបូងខេត្តសៀមរាប បានសម្រេចធ្វើការចោទប្រកាន់លើអ្នកកាសែត TV Online ពីរនាក់គឺលោក ភាព ភារ៉ា និងលោក ផន សុភាព ទាក់ទងនឹងការប្រមូលព័ត៌មាន ដែលអាចធ្វើឱ្យអន្តរាយការការពារជាតិ ប្រព្រឹត្តនៅក្នុងខេត្តឧត្តរមានជ័យ។នេះបើយោងតាមសេចក្តីប្រកាសព័ត៌មានរបស់អ្នកនាំពាក្យអយ្យការអមសាលាដំបូងខេត្តសៀមរាប។
យោងតាមសេចក្តីប្រកាសព័ត៌មាន បានគូសបញ្ជាក់ថា លោក ភាព ភារ៉ា ភេទប្រុស អាយុ៣៤ឆ្នាំ មុខរបរ អ្នកសារព័ត៌មានអង្គភាពធីអេសភី៦៨ធីវីអនឡាញ និង ឈ្មោះ ផន សុភាព ភេទប្រុស អាយុ៤៥ឆ្នាំ មុខរបរ អ្នកសារព័ត៌មានបាត់ដំបងប៉ុស្តិ៍ TV Online ត្រូវបានសមត្ថកិច្ចចាប់ខ្លួន ដោយជាប់សង្ស័យទាក់ទងទៅនឹងការប្រមូលព័ត៌មាន និងការថតរូប នៅក្នុងតំបន់ហាមឃាត់ របស់យោធានៅសមរភូមិ។ តុលាការចាត់ទុកថា ព័ត៌មានទាំងអស់នេះអាចធ្វើឱ្យប៉ះពាល់ដល់ការការពារជាតិ។
បើតាមអ្នកនាំពាក្យ អយ្យការបានស្តាប់ចម្លើយ និង ពិនិត្យភស្តុតាងនានាក្នុងសំណុំរឿង ហើយក៏បានសម្រេចធ្វើការចោទប្រកាន់អ្នកកាសែតទាំងពីរនាក់ទាក់ទងនឹងការប្រមូលព័ត៌មាន ដែលអាចធ្វើឱ្យអន្តរាយការការពារជាតិ ប្រព្រឹត្តនៅក្នុងខេត្តឧត្តរមានជ័យ កាលពីថ្ងៃទី២៥ រហូត ដល់ថ្ងៃទី៣១ ខែកក្កដា ឆ្នាំ២០២៥ ហើយបានបញ្ជូនទៅចៅក្រមស៊ើបសួរនៃសាលាដំបូងខេត្តសៀមរាប ដើម្បីចាត់ការបន្តតាមនីតិវិធី។
យ៉ាងណាកក៏ដោយ អ្នកនាំពាក្យថ្លែងថា៖ «សំណុំរឿងនេះពុំទាន់ត្រូវបានជំនុំជម្រះនៅឡើយទេ ហើយបច្ចុប្បន្ន កំពុងស្ថិតនៅដំណាក់កាលស៊ើបសួរ ដោយចៅក្រមស៊ើបសួរកំពុងស៊ើបអង្កេត ស្វែងរកព័ត៌មាន និងស្រាវជ្រាវ ភស្តុតាងក្នុងសំណុំរឿងនេះ។ បន្ទាប់ពីការស៊ើបសួរចប់សព្វគ្រប់ ចៅក្រមស៊ើបសួរនឹងសម្រេចថា តើជនត្រូវចោទ ពិតជាបានប្រព្រឹត្ត ឬមិនបានប្រព្រឹត្តដូចបទចោទប្រកាន់»។
