អាជ្ញាធរកម្ពុជា អំពាវនាវពលរដ្ឋកំពុងរស់នៅតំបន់ជាប់ព្រំដែន ប្រុងប្រយ័ត្នគ្រាប់បែកចង្កោម ដែលបាញ់ដោយយោធាថៃ

ភ្នំពេញ៖ អាជ្ញាធរកម្ពុជា នៅថ្ងៃទី ២៥ ខែកក្ដដា ឆ្នាំ២០២៥ បានចេញសេចក្ដីអំពាវនាវឲ្យប្រជាពលរដ្ឋកំពុងរស់នៅតំបន់ជាប់ព្រំដែន ប្រុងប្រយ័ត្នខ្ពស់ចំពោះគ្រាប់បែកចង្កោម ដែលបាញ់ដោយកងកម្លាំងប្រដាប់អាវុធថៃ នាថ្ងៃទី២៥ ខែកក្កដា ឆ្នាំ២០២៥ ក្នុងខេត្តព្រះវិហារ។

អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន(អាជ្ញាធរមីន) បានសម្តែងការព្រួយបារម្ភ និងថ្កោលទោសយ៉ាងខ្លាំងបំផុតចំពោះកងកម្លាំងប្រដាប់អាវុធថៃដែលបាន ប្រើប្រាស់គ្រាប់បែកចង្កោម នាថ្ងៃទី២៥ ខែកក្កដា ឆ្នាំ២០២៥ ក្នុងខេត្តព្រះវិហារ ធ្វើឱ្យប្រជាពលរដ្ឋជាពិសេស កុមារទទួលរងរបួស ខូចខាតទ្រព្យសម្បត្តិ និងមានជនភាសឹកជាច្រើនពាន់នាក់។

ជាមួគ្នានេះ ដើម្បីចូលរួមបង្ការ និងទប់ស្កាត់នូវគ្រោះថ្នាក់ដោយសារគ្រាប់បែកចង្កោមទាំងនោះ អាជ្ញាធរមីន បានធ្វើការអំពាវនាវដល់បងប្អូនប្រជាពលរដ្ឋ ដែលកំពុងរស់នៅតំបន់ព្រំដែន រួមមាន៖ ប្រជាពលរដ្ឋនៅពេលប្រទះឃើញគ្រាប់បែកចង្កោម (គ្រាប់មានរូបរាងស្រដៀងនឹងរូបភាពភ្ជាប់) សូមកុំរើស កាន់ គប់ ដំ កែច្នៃ គ្រាប់ទាំងនោះ វាបណ្តាលឱ្យរបួស ពិការ ស្លាប់ គ្រប់ពេល។

ជាងនេះទៅទៀត នៅពេលប្រទះឃើញគ្រាប់ដែលមានភិនភាគដូចរូបភ្ជាប់ សូមរាយការណ៍ជាបន្ទាន់មកកម្លាំង ប្រដាប់អាវុធ នគរបាលជាតិ អាជ្ញាធរមូលដ្ឋាន មេឃុំ មេភូមិ ឬ ប្រតិបត្តិករបោសសម្អាតមីន ដែល នៅក្បែរនោះ ដើម្បីយកគ្រាប់ទាំងនោះទៅកំទេចចោល៕