ផ្លែ«ទុរេនស្រស់»កម្ពុជាជើងដំបូងជាង១៧តោន នឹងដឹកជញ្ជូនទៅចិនតាមច្រកសមុទ្រនៅថ្ងៃនេះ

ភ្នំពេញ៖ ផ្លែទុរេនស្រស់កម្ពុជាជើងដំបូងជាង១៧តោន នឹងដឹកជញ្ជូនទៅចិនតាមច្រកសមុទ្រនៅថ្ងៃនេះ ជាផ្លូវការទៅកាន់ទីផ្សារប្រទេសចិន បន្ទាប់ពីបានឆ្លងកាត់ការត្រួតពិនិត្យ និងការបញ្ជាក់គុណភាពពីក្រសួងកសិកម្ម ស្របតាមពិធីសារនៃការនាំចេញរួចមក។

បើតាមក្រសួងកសិកម្ម ទុរេនទាំងនេះនឹងដឹកចេញតាមច្រកសមុទ្រនៅថ្ងៃនេះ និងគ្រោងទៅដល់ប្រទេសចិនក្នុងរយៈពេល៩ថ្ងៃទៀត។ បើមិនមានអ្វីប្រែប្រួលទេ កម្ពុជានឹងមានទុរេន៣កុងតឺន័រទៀត ត្រៀមដឹកជញ្ជូននាំចេញបន្ថែមនៅសប្តាហ៍ក្រោយ។

ការនាំចេញទុរេនទៅចិននេះ ធ្វើឡើងបន្ទាប់ពីអគ្គរដ្ឋបាលគយចិន (GACC) បានវាយតម្លៃនិងយល់ព្រមលើសំណើចុះបញ្ជីចម្ការទុរេន ចំនួន ១១២កន្លែង និងរោងចក្រវេចខ្ចប់ចំនួន ៣០កន្លែង ដែលបានបំពេញតាមគោលការណ៍កសិកម្មល្អ (GAP) លក្ខខណ្ឌភូតគាមអនាម័យ និងស្តង់ជាសុវត្ថិភាពចំណីអាហាររបស់ប្រទេសចិន។

គួរបញ្ជាក់ថា មកដល់បច្ចុប្បន្ននេះ ផ្លែទុរេនស្រស់គឺជាកសិផលទី៩របស់កម្ពុជា ដែលត្រូវបានអនុញ្ញាតឱ្យនាំចេញ ដោយផ្ទាល់ទៅកាន់ប្រទេសចិន បន្ទាប់ពីអង្គរ កន្ទក់អង្គរ ចំណិតដំឡូងមីក្រៀម គ្រាប់ពោត ផ្លែចេក ផ្លែស្វាយ ផ្លែមៀន និងម្រេច។ នេះគឺជាសមិទ្ធផលផ្លែផ្កាដែលកើតចេញពីកិច្ចសហប្រតិបត្តិការដ៏ល្អរវាងកម្ពុជា និងចិន៕