អត្តពលិកក្រសួងមហាផ្ទៃ បានមេដាយសរុប៦២គ្រឿង ពីព្រឹត្តិការណ៍ប្រកួត«កីឡានគរបាល និងកងពន្លត់អគ្គិភ័យពិភពលោក» នៅអាម៉េរិក

ភ្នំពេញ៖ អត្តពលិកក្រសួងមហាផ្ទៃ បានមេដាយសរុប ៦២គ្រឿង​ រួមមានមេដាយមាស ២២គ្រឿង ប្រាក់ ២២គ្រឿង និងសំរឹទ្ធ ១៨គ្រឿង ពីការចូលរួមក្នុងព្រឹត្តិការណ៍ប្រកួត កីឡានគរបាល និងកងពន្លត់អគ្គិភ័យពិភពលោក (World Police & Fire Games) លើកទី២១ ឆ្នាំ២០២៥ ដែលបានប្រារព្ធធ្វើឡើងចាប់ពីថ្ងៃទី២៧ ខែមិថុនា ដល់ថ្ងៃទី៦ ខែកក្កដា ឆ្នាំ២០២៥ នៅទីក្រុង Birmingham រដ្ឋ Alabama សហរដ្ឋអាមេរិក។​

នៅក្នុងព្រឹត្តិការណ៍ប្រកួត «កីឡានគរបាល និងកងពន្លត់អគ្គិភ័យពិភពលោក» រួមមានកីឡាជឺជីតស៊ូ វាយសី ចំបាប់និងចំបាប់កាច់ដៃ កីឡាយូដូ កីឡា ការ៉ាតេ កីឡាហែលទឹក កីឡាវាយកូនឃ្លីលើតុ កីឡាបាល់ទះ និងកីឡាតេខ្វាន់ដូ។ ក្នុងចំណោមកីឡាទាំង៩ កីឡាជឺជីតស៊ូ កម្ពុជាបានមេដាយមាសរហូតដល់ចំនួន៨ ដែលជាចំនួនលើសកីឡាដទៃដែលភាគច្រើនបានមេដាយមាសចន្លោះ១ទៅ៣។ ចំណែកឯកីឡាដែលបានមេដាយសរុបច្រើនជាងគេ កីឡាចំបាប់ និងចំបាប់កាច់ដៃ ដែលបានមេដាយសរុបរហូត១៩។

ដើម្បីជាការអបអរសាទរសមិទ្ធផលនេះ លោក ស សុខា រដ្ឋមន្រ្តីក្រសួងមហាផ្ទៃ បានរៀបរាប់ថា «ការសម្រេចបានសមិទ្ធផលនេះ ពិតជាបានរួម ចំណែកលើកស្ទួយកិត្យានុភាពរបស់ក្រសួងមហាផ្ទៃ នៅលើឆាកអន្តរជាតិ ជាពិសេសបាន បង្ហាញពីសមត្ថភាពកងកម្លាំងនគរបាលជាតិ ដែលបានខិតខំបំពេញភារកិច្ចក្នុងការចូលរួម ថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ហើយបានយកអស់កម្លាំង កាយចិត្ត និងការប្តេជ្ញាចិត្តខ្ពស់ប្រឹងប្រែងហ្វឹកហាត់រហូតទទួលបានជោគជ័យជូនជាតិមាតុភូមិ។»៕