មន្ទីរសុខាភិបាលខេត្តកំពង់ចាមច្រានចោលព័ត៌មានថា ជនជាតិចិនរត់ចេញពីចត្តាឡីស័ក

កំពង់ចាម៖ ប្រធានមន្ទីរសុខាភិបាលខេត្តកំពង់ចាម​ នៅថ្ងៃទី ៩ខែវិច្ឆិកានេះ បានចេញនូវសារច្រាន​ចោលព័ត៌មានទាក់ទងទៅនឹងការចុះផ្សាយថា មានជនជាតិចិនម្នាក់បានរត់ចេញពីការធ្វើចត្តាឡីស័កនៅក្នុងខេត្តកំពង់ចាម។

ប្រធានមន្ទីរសុខាភិបាលខេត្តកំពង់ចាម លោកវេជ្ជបណ្ឌិត គឹម សួរ ភីរុណ ថ្លែងប្រាប់ស៊ីស៊ីថាមស៍ នៅថ្ងៃនេះថា ជនជាតិចិនដែលមានសារព័ត៌មានចុះផ្សាយថារត់ចេញពីការធ្វើចត្តាឡីស័កនោះ គឺបានមករស់នៅក្នុងប្រទេសកម្ពុជាតាំងពីឆ្នាំ២០១៩ មកម្ល៉េះហើយរូបគេបានធ្វើដំណើរទេសចរណ៍ក្នុងខេត្តកំពង់ចាម ប៉ុន្តែមិនមានឯកសារច្បាស់លាស់។ដូច្នេះតាមការស្នើសុំរបស់អាជ្ញាធរខេត្ត មន្ទីរសុខាភិបាលខេត្តកំពង់ចាមក៏បានយកសំណាករបស់គេយកទៅធ្វើតេស្ត ដើម្បីស្វែងរកកូវីដ ១៩។

បើតាមលោកវេជ្ជបណ្ឌិត គឹម សួរ ភីរុណ បច្ចុប្បន្នមន្ទីរសុខាភិបាលខេត្តកំពង់ចាម បានទទួលរបាយការណ៍ថា លទ្ធផលតេស្តនៃជនជាតិចិនរូបនេះ គឺអវិជ្ជមានកូវីដ១៩ ហើយក្រោយមកអាជ្ញាធរខេត្តកំពង់ចាម បានបញ្ជូនជនជាតិចិនរូបនេះ ទៅអគ្គនាយកដ្ឋានអន្តោប្រវេសន៍ ដើម្បីចាត់វិធានការតាមផ្លូវច្បាប់៕