ភ្នំពេញ៖ រយៈពេល៤ខែដើមឆ្នាំ២០២៥នេះ(មករា-មេសា) កម្ពុជាអាចរកចំណូលបានប្រមាណ ៤,៥ពាន់លានដុល្លារអាម៉េរិក ពីការនាំចេញផលិតផលសម្លៀកបំពាក់ ស្បែកជើង និងផលិតផលធ្វើដំណើរនិងកាបូប កើនឡើងប្រមាណ ២១,៩% ធៀបរយៈពេលដូចគ្នាក្នុងឆ្នាំ២០២៤។ នេះបើតាមរបាយការណ៍ពីក្រសួងការងារ និងបណ្ដុះបណ្ដាលវិជ្ជាជីវៈ។
បើតាមក្រសួងការងារ សុខភាពនៃការនាំចេញក្នុងវិស័យកាត់ដេររបស់កម្ពុជានៅតែមានភាពល្អប្រសើរដោយកើនឡើងដល់ ៤,៥ពាន់លានដុល្លារអាម៉េរិក បើទោះបីជាបរិបទសេដ្ឋកិច្ចសកលមានភាពមិនច្បាស់លាស់។
តម្លៃនៃការនាំចេញសរុបសម្រាប់គ្រប់មុខផលិតផលរបស់កម្ពុជា គិតត្រឹមខែមេសា ឆ្នាំ២០២៥ មានតម្លៃប្រមាណ ៩,៣ពាន់លានដុល្លារអាម៉េរិក ឬកើនឡើងប្រមាណ ១៥,៥% ធៀបរយៈពេលដូចគ្នាក្នុងឆ្នាំ២០២៤ ខណៈតម្លៃនៃការនាំចេញផលិតផលសម្លៀកបំពាក់ ស្បែកជើង និងផលិតផលធ្វើដំណើរនិងកាបូបរបស់កម្ពុជា គិតត្រឹមខែមេសា ឆ្នាំ២០២៥ មានតម្លៃប្រមាណ ៤,៥ពាន់លានដុល្លារអាម៉េរិក។
ក្នុងនោះ ការនាំចេញទៅអាម៉េរិក កើនឡើង ២៦,៧%, ការនាំចេញទៅជប៉ុន កើនឡើង ២១,៨%, ការនាំចេញទៅអឺរ៉ុប កើនឡើង ២១,៧%, ការនាំចេញទៅអាស៊ាន កើនឡើង ១៩,១%, និងការនាំចេញទៅចក្រភពអង់គ្លេស កើនឡើង ១១,៤% ៕
.png?1744178821)
