ទូតឥណ្ឌូនេស៊ីនៅកម្ពុជាគាំទ្រឱ្យកម្ពុជា-ថៃ នាំយកបញ្ហាព្រំដែនទៅកាន់តុលាការយុត្តិធ៌អន្តរជាតិ ICJ

ភ្នំពេញ៖ ឯកអគ្គរដ្ឋទូតឥណ្ឌូនេស៊ី ប្រចាំនៅកម្ពុជា លោក សានតូ ដាមូស៊ូម៉ាតូ (Santo Darmosumarto) នៅថ្ងៃទី ៤ មិថុនានេះ បានថ្លែងចាត់ទុកការសម្រេចនាំយករឿងទៅតុលាការ ICJ ជាជម្រើសមួយរបស់កម្ពុជា។ ការលើកឡើងរបស់លោកនេះដោយយល់ឃើញថា តុលាការអន្តរជាតិនេះ គឺជាយន្តការអន្តរជាតិដ៏សំខាន់មួយលើការដោះស្រាយផ្សេងៗទៀត ដែលប្រទេសឥណ្ឌូនេស៊ី ធ្លាប់បានធ្វើរួមគ្នាជាមួយប្រទេសម៉ាឡេស៊ី។

ថ្លែងក្នុងសន្និសីទសារព័ត៌មាន ពីទំនាក់ទំនងកិច្ចសហប្រតិបត្តិការកម្ពុជា-ឥណ្ឌូនេស៊ី នៅថ្ងៃទី ៤ មិថុនានេះ លោក សានតូ ដាមូស៊ូម៉ាតូ (Santo Darmosumarto) បានគូសបញ្ជាក់ថា ការដោះស្រាយបញ្ហាព្រំដែននៅតុលាការយុត្តិធម៌អន្តរជាតិ ICJ គឺជាដំណោះស្រាយមួយលើដំណោះស្រាយផ្សេងៗទៀត ហើយលោកបានចែករំលែកពីបទពិសោធន៍ដែលប្រទេសឥណ្ឌូនេស៊ី ធ្លាប់បានធ្វើរួមគ្នាជាមួយប្រទេសម៉ាឡេស៊ី។

លោក សានតូ ដាមូស៊ូម៉ាតូ (Santo Darmosumarto) បានលើកទឹកចិត្តឱ្យប្រទេសកម្ពុជា និងថៃ បន្តដោះស្រាយព្រំដែននេះ ហើយត្រូវសហការគ្នា ដើម្បីដោះស្រាយនៅICJ។លោកបានផ្តល់ជាជម្រើសមួយទៀត គឺការដោះស្រាយតាមរយៈអាស៊ាន ដោយប្រទេសទាំងពីរអាចស្នើសុំទៅអាស៊ាន ដើម្បីជួយសម្រប់សម្រួលបាន។