ការងារ«ដំឡើងសាឡង់បូមខ្សាច់»នៅខេត្តកណ្តាល សម្រេចបានប្រមាណ ៩៥%

កណ្តាល៖ វឌ្ឍនភាពការដំឡើងសាឡង់បូមខ្សាច់ នៅក្រុងតាខ្មៅ ខេត្តកណ្តាល សម្រេចបានប្រមាណ ៩៥% ដែលនឹងជួយសម្រួលចរន្តទឹកហូរ ជាពិសេសនៅតាមដងទន្លេមានដុះកោះ ដែលបង្កការរាំងស្ទះដល់ចរន្តទឹក។

បើតាមការចុះពិនិត្យរបស់លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងមន្ត្រីបច្ចេកទេស វឌ្ឍនភាពការងារដំឡើងសាឡង់បូមខ្សាច់ ស្ថិតក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្ដាល សម្រេចបានប្រមាណ ៩៥% ហើយ។

សាឡង់បូមខ្សាច់នេះមានបំពាក់ម៉ាស៊ីន ២គ្រឿងម៉ាក Cummins របស់អាម៉េរិក ដែលមានកម្លាំង ៧៤៦គីឡូវ៉ាត់ និង២៦១គីឡូវ៉ាត់ មានបំពង់បូមខ្សាច់ប្រវែងសរុប ៥២៥ម៉ែត្រ និងមានអង្កត់ផ្ចិតខាងក្នុងទំហំ ៤៥០មីលីម៉ែត្រ។ សាឡង់នេះ គ្រោងនឹងសម្ពោធដាក់ឱ្យប្រើប្រាស់ជាផ្លូវការនៅថ្ងៃទី៨ ខែមិថុនា ឆ្នាំ២០២៥ ខាងមុខ។

បើតាមលោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម សាឡង់នេះនឹងប្រើប្រាស់សំខាន់លើការងារជលសាស្ត្រ បម្រើឱ្យការងារបូមខ្សាច់នៅតាមទន្លេ និងស្ទឹងនានា ដើម្បីជួយសម្រួលចរន្តទឹកហូរ ជាពិសេសនៅតាមដងទន្លេមានដុះកោះ ដែលបង្កការរាំងស្ទះដល់ចរន្តទឹក៕