.png?1741682398)
ភ្នំពេញ៖ រាជបណ្ឌិត្យសភាកម្ពុជា នៅព្រឹកថ្ងៃទី០៩ ខែមេសានេះ បានរៀបចំវេទិកាពិសេសស្តីពី «មិត្តភាពដែកថែបកម្ពុជា-ចិនក្នុងយុគសម័យថ្មី : កិច្ចសហប្រតិបត្តិការឈ្នះឈ្នះ និងវិបុលភាពរួម» ជាផ្លូវការនៅសាលសន្និសីទទន្លេសាប អគារខេមរវិទូ នៃរាជបណ្ឌិត្យសភាកម្ពុជា។ ពិធីនេះធ្វើឡើងក្រោមវត្តមានលោកបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជា, លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃកម្ពុជា នៃរាជបណ្ឌិត្យសភាកម្ពុជា, វាគ្មិនជំនាញទាំងកម្ពុជា និងចិន។
វេទិកាពិសេសនេះ បានរៀបចំដោយ វិទ្យាស្ថានទំនាក់ទំនងអន្តរជាតិនៃកម្ពុជា នៃរាជបណ្ឌិត្យសភាកម្ពុជា។ វេទិកានេះនឹងប្រព្រឹត្តទៅរយៈពេលកន្លះថ្ងៃ ដោយប្រមូលផ្តុំវាគ្មិនមកពីធនាគារខួរក្បាល តំណាងក្រសួងការបរទេសនិងសហប្រតិបត្តិការអន្តរជាតិ តំណាងក្រសួងពាណិជ្ជកម្ម និងតំណាងក្រុមប្រឹក្សាអភិវឌ្ឍន៍កម្ពុជា (CDC) នៃព្រះរាជាណាចក្រកម្ពុជា និងតំណាងសហគ្រាសសំខាន់ៗរបស់ចិននៅកម្ពុជា។ វេទិកានេះមានការអញ្ជើញពីអ្នកចូលរួមប្រមាណ ១០០នាក់ មកពីស្ថាប័នរដ្ឋាភិបាល អ្នកជំនាញ និស្សិត និងតំណាងប្រព័ន្ធផ្សព្វផ្សាយនៅកម្ពុជា។
គោលបំណងវេទិកាពិសេសនេះមានគោលបំណង ពិនិត្យមើលសមិទ្ធផលសំខាន់ៗដែលកើតចេញពីមិត្តភាពកម្ពុជា-ចិន ក្នុងរយៈពេលជាប៉ុន្មានទសវត្សរ៍ចុងក្រោយនេះ, វាយតម្លៃកិច្ចសហប្រតិបត្តិការកាន់តែជិតស្និទ្ធលើវិស័យនយោបាយ សន្តិសុខ សេដ្ឋកិច្ច សង្គម-វប្បធម៌រវាងប្រទេសទាំងពីរ និងទំនាក់ទំនងរវាងប្រជាជននិងប្រជាជនទាំងពីរ, វិភាគអនុភាពខាងក្រៅដែលបង្កជាឧបសគ្គចំពោះមិត្តភាពដែកថែប និងមិនអាចបំបែកបានរវាងកម្ពុជា និងចិន, បង្កើតវេទិកានៃការផ្លាស់ប្តូរបណ្ឌិតសភាដ៏មានកិត្យានុភាពសម្រាប់អ្នកជំនាញ បញ្ញវន្ត អ្នករៀបចំគោលនយោបាយ និងអ្នកតំណាងធុរកិច្ចមកពីប្រទេសកម្ពុជា និងចិន ដើម្បីចែករំលែកទស្សនៈ និងការយល់ដឹងរបស់ពួកគេពាក់ព័ន្ធនឹងទំនាក់ទំនងកម្ពុជា-ចិន, រួមចំណែកពង្រឹង និងពង្រីកមិត្តភាព និងកិច្ចសហប្រតិបត្តិការយូរអង្វែងរវាងកម្ពុជា និងចិន។
សូមជម្រាបថា កម្ពុជា និងចិនបានបង្កើតទំនាក់ទំនងការទូតជាផ្លូវការនៅថ្ងៃទី១៩ ខែកក្កដា ឆ្នាំ១៩៥៨ ប៉ុន្តែទំនាក់ទំនងរវាងប្រទេសទាំងពីរមានតាំងពីសតវត្សរ៍ទី១៣មកម្ល៉េះ។ ក្នុងនាមជាប្រទេសជិតខាង និងដៃគូជិតស្និទ្ធជាប្រពៃណី កម្ពុជានិងចិនបានបង្កើត និងថ្នមថែចំណងមិត្តភាព «ដែកថែប» ដែលមិនអាចបំបែកបានដែលបានឆ្លងកាត់ការសាកល្បង និងការលំបាកជាប្រវត្តិសាស្ត្រជាច្រើន។
ទំនាក់ទំនងដ៏យូរអង្វែងនេះបានវិវត្តទៅជាភាពជាដៃគូយុទ្ធសាស្ត្រគ្រប់ជ្រុងជ្រោយដែលសម្គាល់ដោយការគោរពគ្នាទៅវិញទៅមក ការមិនជ្រៀតជ្រែកកិច្ចការផ្ទៃក្នុងរបស់ផងគ្នា និងកិច្ចសហប្រតិបត្តិការឈ្នះឈ្នះ។ ប្រទេសចិនបានក្លាយជាដៃគូអភិវឌ្ឍន៍ដ៏សំខាន់បំផុតរបស់កម្ពុជា ដោយដើរតួនាទីយ៉ាងសំខាន់ក្នុងការជំរុញកំណើនសេដ្ឋកិច្ចតាមរយៈការវិនិយោគយ៉ាងច្រើនក្នុងវិស័យហេដ្ឋារចនាសម្ព័ន្ធ ពាណិជ្ជកម្ម និងការវិនិយោគលើវិស័យផ្សេងៗទៀត។ គំនិតផ្តួចផ្តើមខ្សែក្រវ៉ាត់និងផ្លូវ (BRI) បានពង្រឹងភាពជាដៃគូនេះបន្ថែមទៀត ដោយជួយសម្រួលដល់ការធ្វើទំនើបកម្មនៃបណ្តាញដឹកជញ្ជូន វិស័យថាមពល និងហេដ្ឋារចនាសម្ព័ន្ធឌីជីថលនៃប្រទេសកម្ពុជា។
បន្ទាប់ពីសម្តេចធិបតី ហ៊ុន ម៉ាណែត ត្រូវបានជ្រើសតាំងជានាយករដ្ឋមន្ត្រីនៃកម្ពុជា ប្រព័ន្ធផ្សព្វផ្សាយ និងសហគមន៍ការទូតបរទេសបានតាមដានគោលនយោបាយការបរទេសរបស់កម្ពុជា ដើម្បីកំណត់ទិសដៅដែលប្រទេសកម្ពុជាកំពុងធ្វើដំណើរ ជាពិសេស គោលនយោបាយការបរទេសកម្ពុជាចំពោះប្រទេសចិន។ និទានកថាជុំវិញគោលនយោបាយការបរទេសរបស់កម្ពុជា ក្រោមការដឹកនាំរបស់សម្តេចធិបតី ហ៊ុន ម៉ាណែត បានបង្កឱ្យមានការលេចឡើងនូការអត្ថាធិប្បាយផ្សេងៗពីការស្ដារឡើងវិញប្រកបដោយសក្តានុពលឆ្ពោះទៅការបង្វែរទិសដៅទៅរកសហរដ្ឋអាមេរិកដោយលះបង់ «មិត្តភាពដែកថែប» ជាមួយប្រទេសចិន។
ទោះជាយ៉ាងណាក៏ដោយ ការបកស្រាយបែបនេះផ្ទុយទាំងស្រុងទៅនឹងមូលដ្ឋាននៃទំនាក់ទំនងដ៏រឹងមាំ និងចាក់ឫសយ៉ាងជ្រៅរវាងកម្ពុជា និងចិន ដែលនៅតែរក្សាបាននូវការជឿទុកចិត្តគ្នាទៅវិញទៅមក កិច្ចសហប្រតិបត្តិការសេដ្ឋកិច្ច និងផលប្រយោជន៍ជាយុទ្ធសាស្ត្ររួម។ នៅពេលដែលប្រទេសកម្ពុជាចាប់ផ្តើមទំព័រនយោបាយថ្មី ការប្តេជ្ញាចិត្តរបស់ខ្លួនក្នុងការធ្វើឱ្យកាន់តែស៊ីជម្រៅនូវភាពជាដៃគូយុទ្ធសាស្ត្រគ្រប់ជ្រុងជ្រោយជាមួយប្រទេសចិន គឺមិនមានការផ្លាស់ប្តូរឡើយក្រោមគោលនយោបាយការបរទេសប្រកបដោយតុល្យភាពនិងឯករាជ្យ។
ផ្ទុយទៅនឹងការអះអាងបែបប្រឌិតនេះ ជំហររបស់កម្ពុជាមិនបានផ្លាស់ប្តូរទេ។ ប្រទេសកម្ពុជាបន្តផ្តល់អាទិភាពដល់ចំណងមិត្តភាពយូរអង្វែងរបស់ខ្លួនជាមួយប្រទេសចិន ទន្ទឹមគ្នានឹងការចូលរួមប្រកបដោយស្ថាបនាជាមួយដៃគូអន្តរជាតិផ្សេងទៀត។ ចំណងមិត្តភាពជាប្រពៃណី ការជឿទុកចិត្តគ្នាទៅវិញទៅមក និងកិច្ចសហប្រតិបត្តិការឈ្នះ-ឈ្នះរវាងគណបក្សកាន់អំណាច និងរដ្ឋាភិបាលនៃប្រទេសទាំងពីរមានសារៈសំខាន់ក្នុងការពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយ និងការកសាងសហគមន៍កម្ពុជា-ចិន ប្រកបដោយគុណភាពខ្ពស់ដែលមានអនាគតរួមគ្នា។ កិច្ចសហប្រតិបត្តិការនេះមានសារសំខាន់ណាស់ក្នុងការជំរុញសន្តិភាព ស្ថិរភាព និងវិបុលភាពក្នុងតំបន់និងក្រៅតំបន់។
ទាំងកម្ពុជា និងចិនបានគាំទ្រយ៉ាងខ្ជាប់ខ្ជួននូវគោលការណ៍ពហុភាគីនិយមដ៏បរិសុទ្ធ ប្រជាធិបតេយ្យ ភាវូបនីយកម្មនៃទំនាក់ទំនងអន្តរជាតិ និងកំណែទម្រង់អភិបាលកិច្ចសកលក្នុងគោលបំណងសម្រេចបាននូវយុត្តិធម៌ និងសមធម៌កាន់តែទូលំទូលាយ។ ប្រទេសទាំងពីរប្រកាន់យ៉ាងម៉ឺងម៉ាត់នូវបទដ្ឋានអន្តរជាតិ ការពារយុត្តិធម៌ និងប្រឆាំងអនុត្តរភាព នយោបាយអំណាច ឯកតោភាគីនិយម ផ្នត់គំនិតសង្រ្គាមត្រជាក់ និងការជ្រៀតជ្រែកក្នុងកិច្ចការផ្ទៃក្នុងប្រទេសដទៃ។ ការប្តេជ្ញាចិត្តរួមគ្នាចំពោះសណ្តាប់ធ្នាប់អន្តរជាតិប្រកបដោយយុត្តិធម៌ និងសមធម៌ ជួយពង្រឹងជំហរស្របគ្នាជាយុទ្ធសាស្ត្ររបស់ប្រទេសទាំងពីរ៕
.png?1744178821)
