ក្រុមហ៊ុនចិនគ្រោងចាយទុន៣៥០០លានដុល្លារ វិនិយោគលើគម្រោងរោងចក្រចម្រាញ់ប្រេងនៅកំពត

ភ្នំពេញ៖ ក្រុមហ៊ុន Guanzun Energy Investment Co., Ltd. គ្រោងចំណាយទុនវិនិយោគសរុបចំនួន ៣៥០០លានដុល្លារអាម៉េរិក ដើម្បីវិនិយោគលើគម្រោងបង្កើតរោងចក្រចម្រាញ់ប្រេងនៅខេត្តកំពត លើផ្ទៃដីចំនួន ២៣៤ ហិកតា។

នៅថ្ងៃទី៤ ខែមេសា ឆ្នាំ២០២៥នេះ ក្រុមហ៊ុន Guanzun Energy Investment Co., Ltd. បានចុះហត្ថលេខាលើកិច្ចព្រមព្រៀងយោគយល់គ្នាជាមួយក្រុមហ៊ុន Sinopec Second Construction Group Co.,Ltd. ក្រុមហ៊ុនChina Railway Port and Navigation Bureau និង ក្រុមហ៊ុនShanxi Construction Investment Co., Ltd. នៅរាជធានីភ្នំពេញ ដើម្បីអនុវត្តគម្រោងរោងចក្រចម្រាញ់ប្រេង ១០លានតោន/ឆ្នាំ ដែលមានទីតាំងស្ថិតនៅខេត្តកំពត។

លោក QIAO GUANJUN ប្រធានក្រុមហ៊ុន Guanzun Energy Investment Co., Ltd. បានថ្លែងថា គម្រោងនេះមានសារៈសំខាន់ចំពោះការអភិវឌ្ឍវិស័យថាមពលនៅកម្ពុជា ក៏ដូចជាសម្រាប់អភិវឌ្ឍន៍សេដ្ឋកិច្ចកម្ពុជាផងដែរ។ គម្រោងនេះអាចចំណាយពេលសាងសង់ចំនួន៣ឆ្នាំ ហើយផែនការទាំងមូលនៃគម្រោងនេះគ្រោងនឹងអនុវត្តចម្រាញ់ប្រេងឱ្យបាន ១០ លានតោន/ឆ្នាំ។

លោកបន្តថា គម្រោងនេះនឹងត្រូវអនុវត្តជា២ដំណាក់កាល ដោយដំណាក់កាលទី១ពាក់ព័ន្ធនឹងការសាងសង់រោងចក្រចម្រាញ់ប្រេង ៥ លានតោនក្នុងមួយឆ្នាំ ជាមួយនឹងទុនវិនិយោគប្រមាណ ២៦០០លានដុល្លារ និងចំណាយពេលសាងសង់ចំនួន១៨ខែ។

ដំណាក់កាលទី២ ពាក់ព័ន្ធនឹងការសាងសង់ និងការដាក់ឱ្យដំណើរការអង្គភាពអង្គភាពចម្រាញ់ប្រេង ៥ លានតោនក្នុងមួយឆ្នាំ ជាមួយនឹងទុនវិនិយោគប្រមាណ ៩០០ លានដុល្លារអាម៉េរិក ដោយចំណាយពេលសាងសង់រយៈពេល ១៨ខែ។

គម្រោងនេះជាគម្រោងចម្រាញ់ប្រេងដំបូងគេនៅកម្ពុជា ហើយវានឹងនាំមកនូវបច្ចេកវិទ្យាស្វ័យប្រវត្តិកម្មប្រកបដោយភាពច្នៃប្រឌិតកម្រិតខ្ពស់ និងឯករាជ្យពីប្រទេសចិន ក៏ដូចជាក្រុមអ្នកជំនាញលំដាប់ទីមួយនៅក្នុងប្រទេសចិន៕