រដ្ឋត្រៀម«រថយន្តក្រុង»១១២គ្រឿង ដឹកពលរដ្ឋទៅសៀមរាប ឥតគិតថ្លៃចាប់ពីថ្ងៃទី១២-១៦ មេសា

ភ្នំពេញ៖ រាជរដ្ឋាភិបាល ត្រៀមរថយន្តក្រុងសាធារណៈ ចំនួន១១២គ្រឿង សម្រាប់បម្រើដល់ការដឹកជញ្ជូនពីរាជធានីភ្នំពេញ មកកាន់ខេត្តសៀមរាប និងការដឹកជញ្ជូន ពីខេត្តសៀមរាបត្រឡប់ទៅរាជធានីភ្នំពេញវិញ ចាប់ពីថ្ងៃទី១២ ដល់ថ្ងៃទី១៧ ខែមេសា ឆ្នាំ២០២៥ ដោយឥតបង់ថ្លៃ។ នេះបើយោងតាមសេចក្តីប្រកាសរបស់រដ្ឋបាលខេត្តសៀមរាប នាថ្ងៃទី០៣ ខែមេសា ឆ្នាំ២០២៥។

ប្រជាពលរដ្ឋអាចធ្វើដំណើរពីរាជធានីភ្នំពេញ មកកាន់ខេត្តសៀមរាប និងពីខេត្តសៀមរាបត្រឡប់ទៅរាជធានីភ្នំពេញវិញ ដោយឥតបង់ថ្លៃចាប់ពីថ្ងៃទី១២ ដល់ថ្ងៃទី១៧ ខែមេសា ឆ្នាំ២០២៥ តាមរយៈរថយន្តក្រុងសាធារណៈ ចំនួន១១២គ្រឿង ដើម្បីកាត់បន្ថយការចំណាយ ចំណេញពេលវេលាប្រជាពលរដ្ឋ កាត់បន្ថយការស្ទះចរាចរណ៍ បង្កើនភាពងាយស្រួល សុវត្តិភាពប្រជាពលលរដ្ឋ។

រថយន្តក្រុង ចេញដំណើរពីភ្នំពេញមកខេត្តសៀមរាប ទីតាំងចំណតដីឡូតិ៍តំបន់ OCICជ្រោយចង្វារ (រង្វង់មូលទេពមច្ឆា) រៀងរាល់ម៉ោង០៦៖៣០នាទីព្រឹក (ចេញជាបន្តបន្ទាប់រហូតអស់រថយន្ត) ចាប់ពីថ្ងៃទី១២ ដល់ថ្ងៃទី១៦ ខែមេសា ឆ្នាំ ២០២៥ មកទីតាំងចំណតមណ្ឌលរដ្ឋបាលមន្ទីរខេត្តសៀមរាប វិថីសម្តេចវិបុលបញ្ញា សុខ អាន (ផ្លូវ៦០ម៉ែត្រ)។

រថយន្តចេញដំណើរពីខេត្តសៀមរាប ទៅភ្នំពេញវិញ នៅថ្ងៃទី១២ ខែមេសា ឆ្នាំ២០២៥ ចេញដំណើរនៅវេលាម៉ោង ១៤៖៣០ នាទីរសៀល, ចាប់ពីថ្ងៃទី១៣ ដល់ថ្ងៃទី១៧ ខែមេសា ឆ្នាំ២០២៥ ចេញដំណើររៀងរាល់ម៉ោង៦៖៣០ នាទីព្រឹក (ចេញដំណើរជាបន្តបន្ទាប់រហូតអស់រថយន្ត), ដោយចេញដំណើរពីទីតាំងមណ្ឌលរដ្ឋបាលមន្ទីរខេត្តសៀមរាប វិថីសម្តេចវិបុលបញ្ញា សុខ អាន (ផ្លូវ៦០ ម៉ែត្រ) ទៅទីតាំងចំណតដីឡូតិ៍តំបន់ OCIC ជ្រោយចង្វារ (រង្វង់មូលទេពមច្ឆា)៕