កម្ពុជាទទួលបានចំណូលជិត១៩លានដុល្លារពីការលក់បណ្ណចូលទស្សនា«រមណីដ្ឋានអង្គរ»

ភ្នំពេញ៖ ៣ខែដើមឆ្នាំ២០២៥នេះ កម្ពុជាទទួលចំណូលជិត ១៩លានដុល្លារ ពីការលក់បណ្ណចូលទស្សនា«រមណីដ្ឋានអង្គរ» ឱ្យទេសចរបរទេសជិត៤០ម៉ឺននាក់ ហើយចំនួនភ្ញៀវកើនឡើងជិត១៥% បើនឹងរយៈពេលដូចគ្នាក្នុងឆ្នាំ២០២៤។ នេះបើតាមរបាយការណ៍ពីគ្រឹះស្ថានអង្គរ។

បើតាមរបាយការណ៍ ចំពោះខែមីនា ឆ្នាំ២០២៥នេះ កម្ពុជាទទួលបានចំណូលជាង ៥,៥ លានដុល្លារ ពីការលក់បណ្ណចូលទស្សនារមណីយដ្ឋានអង្គរឱ្យទេសចរបរទេសជិត១២ម៉ឺននាក់ កើនឡើង ៦.៤ភាគរយ បើធៀបរយៈពេលដូចគ្នាក្នុងឆ្នាំ២០២៤។

របាយការណ៍បញ្ជាក់ថា ក្រៅពីរមណីយដ្ឋានអង្គរ ភ្ញៀវបរទេសក៏បានទិញបណ្ណ និងសំបុត្រចូលទស្សនាប្រសាទផ្សេងៗទៀតដូចជាប្រាសាទកោះកែរ ប្រាសាទបេងមាលា ភ្នំក្បាលស្ពាន និងសំបុត្រជិះទូកម្សាន្តជាដើម។ ក្នុងនោះ ចំណូលពីការលក់បណ្ណនៅប្រាសាទកោះកែរ ខែមីនា ឆ្នាំ២០២៥ មានចំនួន ២ ៦៤៤នាក់ =៣៩ ៦៦០ ដុល្លារ ។ សរុបចំណូលលក់បណ្ណនៅប្រាសាទកោះកែរ រយៈពេល ០៣ខែ ឆ្នាំ២០២៥ មានចំនួន ៩ ៥៤៦នាក់=១៤៣ ១៩០ដុល្លារ ។

ចំណូលពីការលក់សំបុត្រនៅប្រាសាទបេងមាលា ខែមីនា មានចំនួន១ ៧៨៩នាក់ =១៧ ៨៩០ដុល្លារ ។ សរុបចំណូលលក់សំបុត្រនៅប្រាសាទបេងមាលា រយៈពេល ០៣ខែ ឆ្នាំ២០២៥ មានចំនួន ៥ ៥០០នាក់=៥៥ ០០០ដុល្លារ។

ចំណូលពីការលក់សំបុត្រនៅភ្នំក្បាលស្ពាន ខែមីនា មានចំនួន ៨៧នាក់ = ៤៣៥ដុល្លារ។ សរុបចំណូលលក់សំបុត្រនៅភ្នំក្បាលស្ពាន រយៈពេល ០៣ខែ ឆ្នាំ២០២៥ មានចំនួន ៤២៥នាក់=២ ១២៥ដុល្លារ។

ចំណូលពីការលក់សំបុត្រទូក ខែមីនា ក្នុងឆ្នាំ២០២៥ មានចំនួនសរុប =១៩២ ៧២៨ដុល្លារ និង សេវាឈ្នួលទូកសរុប=៣ ៨៥៨ទូក=៨៤ ៤៩៩ដុល្លារ ។ សរុបចំណូលលក់សំបុត្រទូក រយៈពេល០៣ខែ ក្នុងឆ្នាំ២០២៥ មានចំនួន =៦១៣ ៤៥០ដុល្លារ និង សេវាឈ្នួលទូកសរុប=១១ ៨៥៨ទូក=២៦៥ ០៧៨ដុល្លារ។ នេះបើតាមរបាយការណ៍៕