ក្រសួងអប់រំចាប់ផ្តើមអនុវត្ត «គម្រោងមធ្យមសិក្សាសម្រាប់ការប្រកួតប្រជែងមូលធនមនុស្ស» រយៈពេល៦ឆ្នាំ ក្នុងវិទ្យាល័យគោលដៅចំនួន២៥៩

ភ្នំពេញ៖ ក្រសួងអប់រំ នៅព្រឹកថ្ងៃទី១ ខែមេសា ឆ្នាំ២០២៥ បានប្រារព្ធពិធីប្រកាសដាក់ឱ្យអនុវត្តជាផ្លូវការគម្រោងមធ្យមសិក្សាសម្រាប់ការប្រកួតប្រជែងមូលធនមនុស្ស គម្រោងនេះមានរយៈពេល ៦ឆ្នាំ ចាប់ពីខែមីនា ឆ្នាំ២០២៥ ដល់ ខែមិថុនា ឆ្នាំ២០៣១។ គម្រោងនេះបានជ្រើសរើសវិទ្យាល័យគោលដៅចំនួន ២៥៩សាលា ដើម្បីធ្វើ ការអភិវឌ្ឍទាំងផ្នែករឹង និងផ្នែកទន់។

យោងតាមសេចក្តីជូនដំណឹងនៃក្រសួងអប់រំស្តីពីការអនុវត្ត«គម្រោងមធ្យមសិក្សាសម្រាប់ការប្រកួតប្រជែងមូលធនមនុស្ស» បានឱ្យដឹងថាលទ្ធផលរបស់គម្រោងនេះផ្តោតលើចំណុច៤យ៉ាងសំខាន់ៗគឺ ទី១ ដើម្បីបង្កើនលទ្ធភាពទទួលបានការអប់រំមធ្យមសិក្សាទុតិយភូមិ ប្រកបដោយគុណភាព, ទី២ គឺដើម្បីលើកកម្ពស់គុណភាពនៃការអប់រំមធ្យមសិក្សាទុតិយភូមិស្របតាម ជំនាញសតវត្សទី២១ ទី៣ ដើម្បីង្កើនគុណភាពនៃរង្វាយតម្លៃការអប់រំមធ្យមសិក្សាទុតិយភូមិ និងទី៤គឺ ដើម្បីរៀបចំគន្លងអប់រំក្រោយមធ្យមសិក្សា។

បើតាមក្រសួងអប់រំ បានគូសបញ្ជាក់ថា គម្រោងនេះនឹងអភិវឌ្ឍផ្នែករឹង តាមរយៈការសាងសង់ និងបំពាក់បន្ទប់សិក្សាបន្ថែមចំនួន ៤១៤ និងសម្ភារៈបរិក្ខារទឹក និងអនាម័យ (រួមទាំង បង្គន់ចំនួន ៣០០) នៅក្នុងសាលារៀនចំនួន ២៣ ដែលមានសិស្សច្រើន។ បន្ថែមពីនេះ ក្រសួងនឹងកែលម្អនិងបំពាក់សម្ភារៈបរិក្ខារមធ្យមសិក្សាទុតិយភូមិដែលមានស្រាប់ ដើម្បីលើកកម្ពស់វិទ្យាសាស្ត បែបអនុវត្ត និងការបង្រៀន និងរៀនក្រៅកម្មវិធីសិក្សា ។ ជាពិសេស ក្រសួងនឹងបង្កើត និងបំពាក់មជ្ឈមណ្ឌលទិន្នន័យអប់រំបរិយាបន្ន។

ចំណែកឯ ការអភិវឌ្ឍផ្នែកទន់ សាលារៀនគោលដៅនឹងទទួលបានការអភិវឌ្ឍគោលការណ៍ណែនាំរបស់ក្រសួង សម្រាប់សម្ភារៈសិក្សាដែលធន់នឹងអាកាសធាតុ ការពិនិត្យ និងបច្ចុប្បន្នកម្មស្តង់ដាសេវាកម្មអប្បបរមា សម្រាប់វិទ្យាល័យចំណេះទូទៅនិងបច្ចេកទេស ការអភិវឌ្ឍផែនការសកម្មភាពអនុវត្តផែនការយុទ្ធសាស្ត្របញ្ជ្រាបយេនឌ័រ ឆ្នាំ ២០២៦-២០៣០ ។ គម្រោងនេះនឹងផ្ដល់ការអភិវឌ្ឍវិជ្ជាជីវៈជាប្រចាំដល់គ្រូមធ្យមសិក្សាលើជំនាញទន់ និងការអប់រំវិទ្យាសាស្ត្រ និង បច្ចេកវិទ្យា ជំនាញឌីជីថល និងភាសាបរទេស។ បន្ថែមពីនេះ សាលានឹងមានការអប់រំវិទ្យាសាស្ត្រ និងបច្ចេកវិទ្យាបែបអនុវត្ត (Applied STEM) និងមូលនិធិសិក្សាប្រកបដោយ ភាពច្នៃប្រឌិត និង ពង្រឹង និងការបញ្ជ្រាបក្របខណ្ឌការអប់រំវិទ្យាសាស្ត្រ និងបច្ចេកវិទ្យានៅកម្រិតសាលារៀន។ គម្រោងនេះ​ នឹងពង្រឹងការវាយតម្លៃកម្រិតសាលារៀន និងការពង្រឹងដំណើរការ និងការអនុវត្តការប្រឡងថ្នាក់ជាតិ ការអភិវឌ្ឍ និងការសាកល្បងកម្មវិធីពន្លឿន ព្រមទាំង ការអភិវឌ្ឍយុទ្ធសាស្ត្រ ដើម្បីទទួលស្គាល់កម្រិតឧត្តមសិក្សានៃបទពិសោធការសិក្សា និងសមត្ថភាព ពីមុន។

គួរបញ្ជាក់ថា គម្រោងនេះត្រូវបានផ្តល់ហិរញ្ញប្បទានដោយធនាគារអភិវឌ្ឍន៍អាស៊ី មានទឹកប្រាក់ ៨៣.៩២លានដុល្លារ ក្នុងនោះធនាគារអភិវឌ្ឍន៍អាស៊ី ៨០លានដុល្លារ និងបដិភាគរបស់រដ្ឋាភិបាល ៣.៩២ លានដុល្លារ។ គម្រោងខាងលើ គាំទ្រដល់ការលើកកម្ពស់ការអប់រំវិទ្យាសាស្ត្រ និងបច្ចេកវិទ្យា នៅកម្រិត សាលារៀន ជាពិសេសនៅកម្រិតមធ្យមសិក្សា៕