កម្លាំងជំនាញ រកឃើញ«សាច់ គ្រឿងក្នុង និងខួរជ្រូក»គ្មានគុណភាព១,៤០០គីឡូក្រាម

បាត់ដំបង៖ មន្រ្តីអធិការកិច្ចម្ហូបអាហារនៃសាខា ក.ប.ប. ខេត្តបាត់ដំបង នៅថ្ងៃទី១ ខែ មេសា ឆ្នាំ២០២៥ បានចូលរួមសហការជាមួយការិយាល័យនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តបាត់ដំបង ធ្វើការត្រួតពិនិត្យសាច់ជ្រូក គ្រឿងក្នុងជ្រូកនិងខួរជ្រូកដឹកតាមរថយន្ត pick up ដែលនគរបាលប្រឆាំងបទល្មើសសេដ្ឋកិច្ចស្ទាក់ឃាត់ចាប់តាមដងផ្លូវបញ្ជូនទៅស្នងការខេត្តបាត់ដំបង។

ក្រោយការត្រួតពិនិត្យមន្រ្តីជំនាញ បានវាយតម្លៃឃើញថា សាច់ជ្រូក គ្រឿងក្នុងជ្រូក និងខួរជ្រូក សរុបទាំងអស់ ចំនួន៧០ការុង ស្មើនឹង ១,៤០០គីឡូក្រាម ទាំងការវេចខ្ចប់ និងដឹកជញ្ជូន ពុំមានលក្ខណៈត្រឹមត្រូវសមស្រប គ្មានគុណភាព សុវត្ថិភាពតាមលក្ខខណ្ណតម្រូវអនាម័យសម្រាប់មនុស្សបរិភោគឡើយ។

បន្ទាប់ពីត្រួតពិនិត្យរួចរាល់ កម្លាំងសមត្ថកិច្ចទាំងពីរ បានសម្រេចសុំគោលការណ៍ពីលោកព្រះរាជអាជ្ញានៃអយ្យការអមសាលាដំបូងខេត្ត ធ្វើការដុតកម្ទេចចោលតែម្តង។ ការដុតកម្ទេចចោលប្រព្រឹត្តទៅវេលាម៉ោង១១ព្រឹកនៃថ្ងៃ ខែ ឆ្នាំដដែលនៅទីលានចាក់សម្រាម ស្ថិតនៅភូមិអូរមុន្នី ឃុំអន្លុងវិល ស្រុកសង្កែ ខេត្តបាត់ដំបង ដោយមានការចូលរួមពី លោក ជា សុភ័ក្រ ព្រះរាជអាជ្ញារងនៃអយ្យការអមសាលាដំបូងខេត្តបាត់ដំបង៕