ក្រសួងការពារជាតិ នឹងពិនិត្យដើម្បីដាក់ទណ្ឌកម្មលើ«មន្ត្រីយោធា» ឈាវ មុន្និន ដែលរាំតាម

ភ្នំពេញ៖ លោកឧបនាយករដ្ឋមន្រ្តី ទៀ សីហា បានបញ្ជាឲ្យអង្គភាពជំនាញពិនិត្យ និងវាយតម្លៃរាល់ទង្វើរបស់ឧត្តមសេនីយ៍ត្រី ឈាវ មុន្និន នាយករង នៃនាយកដ្ឋានបច្ចេកទេសកងទ័ពអាកាស អគ្គនាយកដ្ឋានសម្ភារៈបច្ចេកទេស ក្រសួងការពារជាតិ ដើម្បីដាក់ទណ្ឌកម្ម ក្រោយបានបង្ហាញរូបភាព និងអាកប្បកិរិយាមិនសមរម្យនៅតាមបណ្តាញសង្គម Tik Tok។

នាពេលថ្មីៗនេះ បុគ្គលឈ្មោះ ឈាវ មុន្នីន មានឋានន្តរស័ក្ដិថ្នាក់ឧត្តមសេនីយ៍ត្រី តួនាទីជានាយករង នៃនាយកដ្ឋានបច្ចេកទេស កងទ័ពជើងអាកាស អគ្គនាយកដ្ឋានសម្ភារៈបច្ចេកទេស ក្រសួងការពារជាតិ មានការបង្ហោះនូវវីដេអូមួយចំនួន នៅក្នុងបណ្តាញសង្គម TikTok ដែលបានបង្ហាញនូវរូបភាព និងអាកប្បកិរិយាមិនសមរម្យក្នុងនាមជាយោធិន ដោយបានធ្វើឲ្យប៉ះពាល់យ៉ាងធ្ងន់ធ្ងរដល់កិត្តិយស សេចក្តីថ្លៃថ្នូរ និងឧត្តមភាពរបស់ក្រសួងការពារជាតិ និងកងយោធពលខេមរភូមិន្ទទាំងមូល។

ដើម្បីធានាការអនុវត្តឱ្យបានម៉ឺងម៉ាត់នូវបទវិន័យ រក្សាឱ្យបាននូវក្រមសីលធម៌វិជ្ជាជីវៈរបស់កងទ័ព លោកនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្តី ក្រសួងការពារជាតិ បានសម្រេចចាត់តាំងឱ្យអង្គភាពជំនាញរៀបចំបង្កើតក្រុមប្រឹក្សាវិន័យ ក្នុងគោលបំណង ធ្វើការពិនិត្យ និងវាយតម្លៃនូវរាល់ទង្វើទាំងឡាយដែលបុគ្គលខាងលើនេះបានប្រព្រឹត្តខុសឆ្គង ដើម្បីដាក់ទណ្ឌកម្មឱ្យស្របទៅនឹងច្បាប់ស្តីពីលក្ខន្តិកៈទូទៅចំពោះយោធិន នៃកងយោធពលខេមរភូមិន្ទ៕